CSAG Viva

Santiago, 19.06.2026.-    O programa ‘Luar’ recibirá esta noite (21:40 h) a visita da cantante Melani, que desde moi pequena amosou unha gran paixón pola música. Saltou á fama en 2018 ao proclamarse gañadora dun coñecido talent infantil con só 11 anos, sorprendendo o público e o xurado pola súa extraordinaria capacidade vocal e por interpretar pezas de grande esixencia técnica pouco habitual en artistas da súa idade. A artista valenciana presentaralle o ao público o seu primeiro EP, ‘Oniria’, que hoxe mesmo ve a luz. Trátase dun proxecto cargado de maxia en que conviven dous mundos: o pop e o da ópera. Neste primeiro álbum de estudio combina a súa sólida formación vocal con sons contemporáneos e unha identidade creativa cada vez máis definida.

Outra figura emerxente que hoxe estará no espazo da TVG é o artista galego Quinte, que busca mesturar todas aquelas referencias que o fixeron amar a música para conseguir un pop con letras e historias do día a día. Interpretará no escenario ‘Conjuro’, un sinxelo musical lanzado en marzo deste ano que destaca pola súa emotividade e os seus ritmos, que falan de desamor, de obsesión e do misterio dos sentimentos.
    
Ademais, o programa presentado por Xosé Ramón Gayoso e Aitana del Mar ofrecerá a actuación de Paco Lodeiro, que actuará en solitario e a dúo con Yennia, un multiinstrumentista e vocalista que, formado polos grandes mestres do panorama galego, está a revolucionar o mundo da verbena.

Un mundo en que destaca El Combo Dominicano, unha das orquestras máis populares na nosa terra, que tamén está convidada ao ‘Luar’ deste venres. Cun estilo propio que fusiona merengue, bachata, salsa e cumbia, converte cada unha das súas actuacións nunha auténtica festa.

Completan o cartel musical deste venres a Rondalla de Cedeira e banda madrileña de ska, punk e rock Boikot, que se caracteriza pola mensaxe de compromiso social das súas cancións.

Nesta edición de ‘Luar’, en que se falará do invento máis caro da historia, o humor virá da man de Todo Mal e dos personaxes de Rosita e Lalo Penelas, interpretados por Patricia Vázquez e Xosé A. Touriñán, respectivamente. No tempo do concurso ‘Recantos’, esta semana será a quenda de Flor Becerra, representante de Galicia centro, e de Lu Pérez, procedente da comarca da Arousa.

Santiago, 18.6.2026.-    A Televisión de Galicia ten preparada para esta fin de semana unha ampla despregadura de retransmisións que repartirá a través das dúas canles de TDT e a plataforma AGalega.gal.

A G2 e AGalega.gal ofrecen o venres desde as sete da tarde o terceiro partido da final da OK Liga de hóckey sobre patíns entre o Igualada e o Liceo. Tras as dúas vitorias no palacio dos deportes de Riazor, o equipo coruñés está a cincuenta minutos de conseguir o segundo título da temporada logo de conquistar hai uns meses a Copa do Rei ante o Calafell. En caso de perder, a final prolongaríase polo menos ata o domingo, coa celebración do cuarto punto que está programado para as oito e media do serán. De se disputar, os espectadores tamén poderían seguir o xogo a través da segunda canle da TVG e da plataforma AGalega.gal.

O sábado, a partir das seis e media da tarde, a primeira canle da Televisión de Galicia retransmitirá en directo desde Balaídos o partido histórico entre o Celta Fortuna e a Ponferradina, que pode situar o filial olívico no fútbol profesional. O empate a cero do Toralín permítelle ao equipo de Fredi xogar coa baza de que outra igualada tras prórroga abondará para dar o salto de categoría. Así e todo, o rival berciano vén de eliminar o filial do Atlético de Madrid nas semifinais gañando o partido de volta no campo colchoeiro. Por primeira vez na temporada, o Celta abre todas as bancadas do estadio de Balaídos co obxectivo de que o campo sexa unha caldeira que xogue a favor da canteira celeste.

Mentres, o domingo ás 12:30 do mediodía chegará a través da G2 e de AGalega.gal o partido de volta da final nacional de ascenso á Segunda RFEF entre o Badalona e o Compostela, con clara vantaxe para os santiagueses tras vencer na ida por 3-0, no estadio Vero Boquete. O equipo que prepara Secho viaxa sabendo que o adversario foi quen de eliminar o Cornellá na anterior eliminatoria, despois de remontar no seu campo o 4-1 encaixado en Cornellá.

Ás tres e ás cinco da tarde o protagonismo será para o motor coas dúas mangas do Gran Premio de Italia do Campionato do Mundo de MXGP, que regresa cunha novidade histórica. O circuíto Miravalle de Montevarchi, no val do Arno, acolle por primeira vez un gran premio, despois de 18 anos de ausencia do motocrós de elite na zona. Rubén Fernández, que compite con Honda, chega a Montevarchi como un dos referentes do pelotón. Tras o podio logrado en Alemaña, o vigués quedou sétimo no Gran Premio de Letonia. O piloto vigués marcha sétimo no campionato con 247 puntos, a 157 do líder, o belga Lucas Coenen.

Deportes nos telexornais

Durante a fin de semana, os espectadores estarán informados do que pase no mundo do deporte a través dos espazos especializados no ‘Bos Días’, ‘Telexornal Mediodía’ e ‘Telexornal Serán’. Os resumos dos partidos do Mundial destacarán o sábado o que suceda no Escocia-Marrocos, Brasil-Haití, Turquía-Paraguai e Países Baixos-Suecia. O domingo, a oferta repartirase con este calendario: Alemaña-Costa do Marfil, Ecuador-Curaçao, Tunisia-Xapón e España-Arabia Saudita.

Santiago, 19.6.2026.-   AGalega.gal continúa ampliando o seu catálogo cunha nova selección de estreas que inclúe ficción, documentais e programas de entretemento. Coincidindo coa celebración da Semana do Orgullo 2026, a plataforma incorpora tamén novos contidos relacionados coa diversidade afectivo-sexual e de xénero. Estas novidades súmanse á cobertura dos grandes eventos semanais da grella da TVG, como o especial de San Xoán, a Romaría do Corpiño ou as retransmisións deportivas que a plataforma ofrece en directo.

Entre as incorporacións destacadas figura a estrea de dous documentais. O mércores 24 chegará ‘O país dos cen mil hórreos’, unha viaxe pola historia, a evolución e a diversidade destas construcións tradicionais, símbolo do patrimonio cultural galego. 

Uns días despois, o venres 26, estrearase ‘Dereito a amar’, unha achega íntima á realidade das persoas maiores LGTBIQ+, centrada nas súas experiencias de vida, identidade, envellecemento e pertenza. Este documental estará dispoñible durante 21 días. A plataforma incorporará tamén o luns 22 ‘Todas as cores do amor’, unha nova sección dedicada a contidos relacionados coa diversidade afectivo-sexual e de xénero. 

O martes 23 estarán dispoñibles novos capítulos de ‘Lambóns de viaxe’, o videopodcast presentado por Carlos García Verdugo, que propón descubrir destinos e experiencias sen saír da casa. Ademais, o luns 29 estrearase unha nova temporada de ‘O mellor tractor do mundo’, o formato dixital que percorre Galicia para coñecer as historias, habilidades e tractores das persoas candidatas a esta singular distinción, coa participación do público na elección final e un novo episodio cada luns.

As novidades complétanse con novos capítulos de ‘Padre Casares’, dispoñibles desde o xoves 18. A popular serie segue as peripecias dun novo cura destinado a unha vila costeira, onde terá que convivir e confrontar as súas diferenzas co alcalde local, un declarado ateo e marxista.

No apartado cinematográfico, AGalega.gal ofrecerá varias estreas ao longo dos próximos días. O venres 19 chegará ‘A morte chega a Venecia’, dispoñible durante 30 días, unha intriga arredor da investigación dunha viúva que, tras a morte do seu marido nun canal veneciano, descobre unha trama relacionada coa falsificación e o roubo dunha obra de Botticelli. O sábado 20 incorporarase ‘A cea perfecta’, tamén dispoñible durante 30 días, a historia de dúas persoas cuxas vidas están relacionadas co mundo da alta gastronomía. Finalmente, o xoves 25 estrearase ‘Crónica dunha relación pasaxeira’, que relata o inesperado vínculo que xorde entre unha nai solteira e un home casado que inicialmente buscan unha relación sen compromiso sentimental.

Santiago, 18.06.2026.-    O ‘Galicia en Goles’ desta fin de semana principia ás 18:55 h do venres coa retransmisión do terceiro partido da final da OK Liga de hóckey sobre patíns entre o Igualada e o Liceo. Tras gañar os dous primeiros encontros disputados en Riazor, o cadro coruñés busca a terceira vitoria que o proclame campión. Durante a tarde, o programa tamén atenderá á xornada do Mundial de fútbol e analizará o proxecto ‘Elas xogan’, impulsado pola Federación Galega de Fútbol na cidade de Ferrol para promover a presenza feminina nesta disciplina.

O sábado, a programación comezará ás 14:15 h e manterase ata a medianoite coa final de ascenso á Segunda División, xa que ás 18:30 h o Celta Fortuna recibe a Ponferradina. A eliminatoria está aberta tras o empate a cero goles da ida, pero o equipo vigués ten o factor campo a favor e válelle a igualada tras prórroga para abandonar a Primeira RFEF e recalar no fútbol profesional.

Outro punto de directo será o campo do Monte, onde o San Tirso e o Antela disputan a volta da final da eliminatoria de ascenso á Terceira RFEF. A cita decisiva ten como referencia o empate sen goles de hai unha semana na Moreira.

O domingo, desde as 12:00 ata as 00:00 h, o ‘Galicia en Goles’ contará o desenlace da final de ascenso á Segunda RFEF entre o Badalona e o Compostela. A vitoria na ida por 3-0 sitúa o equipo da capital de Galicia moi preto de regresar á cuarta categoría.

Ao longo da mañá, o programa dará cobertura ás dúas eliminatorias de volta dos playoffs de ascenso á Primeira División de fútbol sala feminino. O Marín xoga o seu regreso fronte ao Intersala Zaragoza, despois de que na ida na Raña o marcador final fora de empate a un gol. Mentres, o Estrela Cortegada, campión do Grupo 1 de Segunda División, afronta o desenlace fronte ao CFS Linyola coa aspiración de consumar o ascenso tras gañar a domicilio a semana pasada por 4-1.

O Mundial de Fútbol tamén terá presenza coa retransmisión do partido España-Arabia Saudita, correspondente á segunda xornada. As dúas seleccións comezaron con empate o campionato: 0-0 de España ante Cabo Verde e 1-1 de Arabia fronte ao Uruguai.

A última sesión da xornada estará protagonizada polo fútbol máis modesto. O Portonovo e o Lemos, que chegan á final do playoff de ascenso á Terceira RFEF despois de eliminar respectivamente o Ordes e o Negreira, pechan o domingo coa disputa do partido decisivo e coa vantaxe para o equipo do Baltar tras gañar na ida por 0-1 no campo da Pinguela.

#GaliciaEnXogo

Cando rematen os partidos, ás 23:00 h, o ‘Galicia en Goles’ abrirá unha fiestra a outras disciplinas. O mundo do motor estará presente durante 30 minutos para actualizar os datos das competicións máis recentes, con atención ao Gran Premio de Italia no Mundial MXGP de motocrós. A partir das 23:30 h, terán presenza os deportistas galegos que preparan durante este ciclo olímpico os próximos Xogos dos Ánxeles 2028.

Santiago, 12.06.2026.- O equipo de actores e actrices da nova produción da Televisión de Galicia ‘Pensión incompleta’ acudíu este venres en Vigo ao Festival Internacional de Series Ría de Vigo, punto de encontro clave do sector audiovisual, creadores, intérpretes e público afeccionado ás series.  A proxección do tráiler da serie, a primeira que se grava nas catro linguas oficiais –galego, castelán, éuscaro e catalán- tivo lugar na gala de clausura do certamen, no que tamén se preestreou a comedia ‘Millonarios’ que chegará á grella da TVG o vindeiro outono.

'Pensión incompleta’ é unha comedia con aires de thriller en que un grupo de viaxeiros do Imserso procedentes de distintas rexións de España se ve envolto nunha trama de roubos de obras de arte. Coproducida por TVG, EiTB e 3Cat, é a primeira serie rodada nas catro linguas oficiais do Estado -galego, éuscaro, catalán e castelán-. Voz Audiovisual produce esta road movie pensada para ser gozada en versión orixinal que pasa por todas as comunidades e na que mandan os maiores de 60. 

Como media partner do certame, a Televisión de Galicia tamén adiantou na gala de clausura do festival, o primeiro capítulo da comedia ‘Millonarios’ unha das grandes apostas de ficción da TVG para a vindeira temporada. Protagonizada por Xosé A. Touriñán e Eva Iglesias, a serie narra as aventuras de Telmo e Luísa, unha parella que ve como a súa vida dá un xiro radical tras gañar o Euromillón. Haberá tamén espazo para o coloquio sobre esta comedia que constrúe unha divertida mirada sobre o contraste entre os códigos de luxo e o sentido común máis galego, seguindo as peripecias dos protagonistas na súa nova realidade.

Santiago, 14.06.2026- A Televisión de Galicia tivo na súa mascota Xabarín o seu perfecto embaixador no “Torneo de Fútbol Base Abanqueiro S.D. - Trofeo Concello de Boiro”, competición en que participaron 120 equipos de toda Galicia e que congregou nos Campos de Vista Alegre máis de 5.000 persoas ao longo das dúas últimas fins de semana.

O torneo, que xa vai pola súa 17ª edición e que se converteu no gran referente do fútbol base galego, contou con finais para todas as categorías infantís de entre 5 e 11 anos: biberón, prebenxamín, benxamín e alevín, sendo a gran novidade deste ano a estrea da final alevín feminina.

O Xabarín foi protagonista nas dúas fins de semana de competición, pero especialmente na última xornada, disputada o domingo 14 de xuño, e na que a mascota da Galega lle entregou un carné xigante de Socio de Honra do Club Xabarín á Escola de Fútbol Municipal de Boiro, organizadora do torneo.

Ao longo das 4 xornadas de competición, a megafonía dos Campos de Vista Alegre non cesou de repetir a mítica frase “Hai alguén aí?... Non vos oio!”, coa que o Xabarín animou as máis de 5.000 persoas que pasaron por Boiro. Ademais, os 120 equipos participantes non dubidaron en gravar o momento posando para as súas fotos oficiais do torneo diante dun photocall en que a mascota da Galega convidaba a todos a formar parte da súa plataforma dixital Xabarín.gal

Santiago, 11.06.2026.-  O informativo ‘Galicia Noticias’ da TVG foi o espazo de televisión máis visto deste mércores en Galicia, cunha cota de pantalla do 25,4 % e picos por riba do 28 %.

Ademais, ‘Land Rober + Show’ liderou un día máis entre os espazos de entretemento do día, cunha cota do 12,7 %.

Os dous programas da Televisión de Galicia foron os máis vistos do día na comunidade, o que reforza a resposta da audiencia ás propostas da canle galega, tanto no eido informativo coma no de entretemento. 

‘Land Rober +Show’ contou este mércores cunha audiencia media de 98.000 telespectadores por minuto, e acadou 190.000 contactos de espectadores maiores de 4 anos.

Santiago, 05.06.2026.-   Galicia acollerá o Celtic Media Festival 2027, na cidade da Coruña do 1 ao 3 de xuño. O labor conxunto da TVG e o Clúster do Audiovisual Galego fixo posible que a 48ª edición do prestixioso certame, o principal encontro internacional dedicado á promoción das linguas, culturas e industrias audiovisuais das nacións celtas, vaia ter lugar en Galicia.  

O Celtic Media Festival reúne anualmente a profesionais, produtores, directivos de medios e responsables de contidos dos territorios celtas de Europa e recoñece os seus mellores traballos en televisión, radio, cinema e novos medios. O programa do evento combina conferencias, actividades profesionais, sesións de networking, foros de coprodución e a entrega dos prestixiosos Torc Awards for Excellence, considerados entre os galardóns máis relevantes do sector audiovisual e radiofónico. Nesta contorna, as producións galegas compiten con operadores e plataformas de referencia como a BBC, RTÉ, TG4, S4C, MG ALBA ou France 3 Bretagne. Na edición deste ano, rematada o xoves en Belfast (Irlanda do Norte), a longametraxe da TVG ‘+ Cuñados’, alzouse co premio Celtic Media na categoría de Comedia.

O festival percorreu territorios como Escocia, Irlanda, Gales, Bretaña, Cornualles ou a Illa de Man, consolidándose como unha referencia internacional para a creación audiovisual en linguas minorizadas e para a promoción da diversidade cultural.

Santiago, 31.5.2026.-  Televisión de Galicia dá a benvida ao mes de xuño cunha renovada aposta polo entretemento e a proximidade. A grella de verán da canle incorpora desde este luns novos formatos pensados para acompañar, emocionar e sorprender a audiencia galega. 

As tardes terán un novo punto de encontro con ‘En compañía de Loli’, un espazo diario que chegará ás sobremesas da TVG de luns a venres ás 15:45 horas cunha proposta próxima, cálida e chea de historias compartidas. Programa de éxito nas canles públicas de Andalucía e Castela-A Mancha, ‘En compañía de Loli’ mestura entretemento e servizo público e chega á TVG nun formato moi pegado á realidade galega e conducido por Loli Gómez e Marcial Mouzo. Eles darán especial protagonismo no estudio a persoas que viven situacións de illamento ou queren ter a posibilidade de coñecer xente nova, iniciar novas relacións e compartir as súas vivencias. 

A música e a tradición serán protagonistas en ‘Palmira Lará’, un percorrido por toda Galicia para descubrir o enorme patrimonio musical do país da man das súas voces e sons e tradicións. Emitirase os luns á noite despois de ‘Land Rober + Show’. Os espectadores acompañarán a Miguel Lesta e Leticia Rei, dous profesores de baile tradicional e divulgadores da nosa cultura, na recollida e recompilación das cancións, bailes e historias, transmitidas de xeración en xeración. 

E os martes á noite chega ‘Casa de cor’, un formato dinámico de decoración e organización presentado por Dani Polo. Xunto aos expertos Ana Barja e Eduardo Figueiredo, o programa afrontará en cada entrega o reto de transformar en só 48 horas dúas estancias reais de fogares galegos, con solucións creativas e cun orzamento pechado.

Santiago, 31.5.2026.-  Televisión de Galicia dá a benvida ao mes de xuño coa estrea de ‘En compañía de Loli’, programa diario para a sobremesa (15:50 h) presentado por Loli Gómez e Marcial Mouzo. O espazo, un formato de éxito nas canles públicas de Andalucía e Castela-A Mancha que se adapta agora á Galega, chega a TVG para acompañar, escoitar e axudar as persoas que sofren unha soidade non desexada. 

‘En compañía de Loli’ mestura entretemento e servizo público nun formato próximo e sensible, moi pegado á realidade galega, en que terán especial protagonismo as persoas que viven situacións de illamento ou a falta de vínculos sociais. Cada tarde, de luns a venres e durante dúas horas de programa en directo, os espectadores coñecerán as historias de vida de dúas persoas, home e muller, que compartirán as súas experiencias e se abrirán á posibilidade de iniciar novas relacións. 

Os presentadores son dúas caras ben coñecidas e queridas da canle, a xornalista Loli Gómez e Marcial Mouzo, ata hai pouco presentador do ‘Quen anda aí’ da TVG e do histórico espazo da Radio Galega ‘Pensando en ti’. Eles escoitarán os convidados e axudaranlles para evitar decisións precipitadas. Todo listo no plató para a gran estrea do luns e co teléfono 881 365 999 dispoñible para quen queira participar, contar a súa historia ou axudar a alguén que se sinta só. 

Santiago, 25.05.2026.-   AGalega.gal continúa esta semana reforzando a súa oferta audiovisual, coa incorporación das principais novidades da grella da TVG e dunha selección de contidos destacados para todos os públicos. Entre eles sobresae a retransmisión en directo dos Premios Martín Codax da Música, unha das grandes celebracións anuais da cultura galega contemporánea, xunto coa estrea do documental galego ‘Aurora’, así como a incorporación de dous filmes internacionais.

A plataforma ofrecerá o mércores 27, a partir das 20:30 horas, a décimo terceira gala dos Premios Martín Codax da Música, organizada por Músicas ao Vivo para recoñecer e visibilizar o talento musical galego en estilos e formatos moi diversos. Desde o Pazo da Cultura de Pontevedra, a cerimonia terá como temática ás supersticións e estará dirixida pola actriz Tero Rodríguez. Estes galardóns, que distinguen cada ano artistas, proxectos e iniciativas que contribúen á creación e difusión da música galega, rexistraron nesta convocatoria preto de 450 inscricións nas 15 categorías oficiais. O Premio de Honra outorgarase nesta edición á banda Los Suaves. A retransmisión poderá seguirse en directo en AGalega.gal e quedará posteriormente dispoñible na plataforma.

Entre as novidades da semana destaca tamén a estrea, o xoves 28, da longametraxe documental ‘Aurora’, unha produción galega centrada na relación entre Aurora e Area, dúas mulleres de xeracións e realidades moi diferentes, pero unidas por unha conexión profunda arredor de temas como a memoria, da familia, da guerra, da morte e do papel da muller.

No apartado cinematográfico, AGalega.gal incorporará o venres 29 o thriller ‘O cliente’, a historia dun neno que se converte en testemuña involuntaria dun suicidio relacionado coa mafia e que acaba atrapado entre as presións dun fiscal federal e as ameazas derivadas dos segredos que coñece. Para intentar salvar a súa vida, recorrerá á axuda dunha avogada. O filme estará dispoñible durante sete días.

A programación completarase o sábado 30 coa chegada de ‘Esperanza’, un melodrama ambientado no Nadal que retrata a crise emocional dunha parella de artistas tras recibir ela un diagnóstico terminal. A historia aborda o amor, a convivencia e a fraxilidade da vida nun momento límite. Este título permanecerá dispoñible durante 30 días.

Ademais destes contidos destacados, AGalega.gal seguirá incorporando ao longo da semana todas as estreas e programas máis relevantes da programación da TVG, entre eles, a tradicional Romaría da Franqueira, que estará dispoñible desde mañá martes 26.

Santiago, 20.05.2026.- A  Corporación de Servizos Audiovisuais de Galicia, a Universidade de Santiago de Compostela e a Federación de Organismos de Radio e Televisión Autonómicos (FORTA) unen forzas para celebrar unha xornada de reflexión prospectiva centrada nunha pregunta clave: como será o profesional sénior dos medios en 2035?

Responsables de Innovación e Transformación das doce canles de televisión que forman a FORTA, docentes universitarios e especialistas do sector debaterán nesta xornada, na que se escoitará tamén a voz dos profesionais júnior e estudantes en prácticas, a xeración que exercerá como sénior en 2035. Deste xeito combinarase a visión institucional e estratéxica desde o interior dos medios coa perspectiva dos formadores e dos profesionais más novos. A Facultade de CC da Comunicación de Santiago acollerá o encontro, aberto e gratuíto, no que xa é posible inscribirse.

O contexto: unha transformación sen precedentes nos medios

A irrupción da intelixencia artificial nos procesos produtivos e informativos, a presión das plataformas globais sobre os medios de proximidade e a necesidade de reformular o papel do profesional con experiencia en organizacións que deben reinventarse sen perder a súa misión de servizo público.

Este é o contexto en que se convoca a xornada, que se celebrará en catro paneis de debate para construír o mapa de competencias do futuro.

    • O primeiro pregúntase polo perfil do comunicador sénior en 2035: a súa formación, os seus límites e a hibridación entre o técnico e o xornalístico xa en marcha.
    • O segundo porá sobre a mesa as competencias que a automatización consolida e as que vai erosionando, e a forma en que se transmite o oficio cando as referencias cambian máis rápido que os plans de estudo.
    • Despois vén a pregunta máis incómoda: ata onde pode substituír a IA o criterio editorial humano, e que papel queda reservado á experiencia sénior?
    • E finalmente, o cuarto, preguntarase pola retención do talento: teñen os medios públicos capacidade real de competir polo mellor perfil no horizonte de 2035?

Tripla alianza institucional para afrontar o futuro do xornalismo público

A xornada coincide coa celebración en Santiago da xuntanza da Comisión de Transformación e Innovación de FORTA, coordinada este primeiro semestre de 2026 pola CSAG. Esta colaboración entre a Corporación, a USC e FORTA establece un novo paso na vía de investigación permanente coa USC e alimentará un paper avalado pola USC e FORTA que pretende achegar unha aproximación ao perfil profesional sénior dos medios públicos no 2035.
 

Santiago, 18.5.2026.-  A plataforma AGalega.gal incorpora esta semana estreas en que conviven o suspense, o humor galego e a música tradicional do país. Entre as propostas novas sobresae o martes ‘Maxine’, unha miniserie británica de tres capítulos baseada nun caso real que afonda nun dos episodios máis mediáticos e estarrecedores da crónica negra do Reino Unido. 

A produción, dispoñible en versión orixinal subtitulada en galego, céntrase na investigación arredor de Maxine Carr e da súa relación con Ian Huntley, condenado polos asasinatos das nenas Holly Wells e Jessica Chapman. Cun ton de thriller e unha forte carga psicolóxica, a serie analiza tamén o impacto social e mediático dun caso que conmocionou o país.

A semana deixa tamén espazo para o humor coa chegada o luns de '+Cuñados’, a continuación da comedia galega de éxito protagonizada polos peculiares cuñados que, dous anos despois do seu golpe de sorte, seguen intentando branquear medio millón de euros a través dun negocio de polbo. O regreso dunha banda portuguesa en pleno Entroido acabará desencadeando unha nova sucesión de situacións absurdas, persecucións e problemas que rematan cun cadáver na ponte internacional de Tui.

Outro dos pratos fortes chegará o venres co concerto SonDeSeu XXV aniversario, un espectáculo especial co que a orquestra folk de Galicia celebra os seus 25 anos de traxectoria, acompañada de artistas de referencia da música galega, como Abraham Cupeiro, Tanxugueiras, Xabier Díaz e Rodrigo Romaní. A cita reivindica a música tradicional galega e a súa proxección internacional nun concerto homenaxe á historia e evolución da formación.

Completa a oferta semanal o filme ‘Case imposible’, unha comedia romántica en que Charlotte Field, secretaria de Estado dos Estados Unidos, e Fred Flarsky, un xornalista que acaba incorporándose á súa campaña presidencial polo seu peculiar sentido do humor. O filme estará dispoñible desde este xoves e durante sete días na plataforma.

Ademais destas estreas, AGalega.gal continuará incorporando ao longo da semana novos contidos e programas da grella da TVG, consolidando unha oferta audiovisual diversa, accesible e en constante actualización.

Santiago, 10.5.2026.-   Televisión de Galicia ten novidades para ás sobremesas da primeira canle. O luns 11 de maio (16:30 h) chega ‘Taxi Quiz’, un formato de entretemento que combina concurso, emoción e espontaneidade nun escenario tan cotián como imprevisible: un taxi en movemento. Presentado por Carla Núñez, o programa transforma cada traxecto nun espontáneo estudo televisivo sobre rodas e nun reto en que o coñecemento, a rapidez mental e os nervios serán decisivos.

Ao longo de distintas rutas por Galicia, os pasaxeiros que soben ao vehículo descubrirán que a súa viaxe agocha moito máis que un simple desprazamento. Sen esperalo, converteranse en concursantes improvisados dun xogo de preguntas e respostas en que cada acerto suma, pero cada erro resta. Un concurso moi dinámico en que os viaxeiros poden pasar da euforia de acumular premio ao momento máis inesperado de ter que pagar eles mesmos a carreira. Nunca un traxecto deu tanto xogo!

Tras a estrea de ‘Taxi Quiz’ chega á grella ‘Mira ti que ben. Imos de voda’, unha proposta de entretemento fresca, divertida e chea de personalidade en que o dúo humorístico Todo Mal mergúllase nas vodas máis emocionantes, sorprendentes e inesquecibles do programa ‘Casamos!’. Con retranca, espontaneidade e unha mirada moi próxima á realidade galega, os presentadores revisitan os momentos máis memorables de cada enlace: os nervios antes do “si, quero”, as historias de amor máis singulares, as tradicións familiares, as anécdotas inesperadas e todos eses detalles que converten cada voda nunha celebración única.

A través dunha combinación dinámica de imaxes de arquivo de ‘Casamos!’ e o inconfundible estilo de Todo Mal, o programa ofrece unha viaxe entretida e chea de humor polo universo das vodas galegas. Un formato que pon en valor tanto a emoción e a autenticidade das parellas como o lado máis humano, divertido e sorprendente de cada celebración.

Carla Núñez e Marcos López, integrantes de Todo Mal, formaron o seu dúo artístico en 2022, cando decidiron levar ás redes sociais o seu humor a través dun videopodcast en galego, que axiña se converteu nun fenómeno viral. Coa retranca, a improvisación e a análise da actualidade en clave cómica, o proxecto medrou ata consolidarse como unha proposta humorística moi popular entre o público galego. Antes diso, ambos xa traballaran como guionistas no programa da TVG ‘Land Rober Tunai Show’. Na actualidade participan tamén noutros espazos dos medios públicos, como ‘A bóla extra’ e ‘Luar’.
 

Santiago, 6.5.2026.-  Hai programas que se ven e programas que se senten. ‘Tarde piaches’ nace coa vocación de ser o espazo onde Galicia se recoñeza cada fin de semana. O novo magazine da TVG chega á grella este sábado 9 de maio, coa intención de poñer en valor o territorio a través das súas historias e, sobre todo, da súa xente.

Á fronte deste proxecto estarán dúas profesionais moi coñecidas da pequena pantalla, a lucense Silvia Jato, cunha ampla traxectoria televisiva, e a carismática actriz Isabel Blanco como copresentadora. Xuntas liderarán unha viaxe de catro horas en directo, de 15:50 a 19:50 horas.

Unha sobremesa para conversar e divertirse 

Cada edición, ‘Tarde piaches’ comezará cunha conversa centrada nas inquedanzas da audiencia. Neste escenario, os convidados relatarán as súas vivencias en primeira persoa, convertendo o espazo nun punto de encontro e diálogo onde non hai temas tabú. Esta sobremesa inicial servirá de antesala a un abano de seccións e colaboradores, que buscarán entreter e acompañar o público sen présa, pero con moito ritmo.

Os sábados, o divulgador científico e xornalista Xavier Fonseca achegará ‘Historias do tempo’, unha sección que explicará os fenómenos meteorolóxicos que condicionan o noso día a día. O toque de humor porano Carlota Ghatos e a súa avoa Pepa, cunha intervención destinada a contrastar as visións de dúas xeracións diferentes a través da linguaxe e as redes sociais.

Os domingos será a quenda do xornalista Manuel Gago con ‘As cousas de Gago’, un espazo para descubrir os segredos mellor gardados do noso patrimonio. Ademais, os maiores volverán ter protagonismo cun receitario que revela as fórmulas secretas dos pratos máis emblemáticos e curiosos do país.

A oferta das dúas xornadas complétase cun concurso, onde se poñerán en valor as imaxes de arquivo, reportaxes, entrevistas e actuacións musicais. 

Baixo a dirección de Matías Tarrío e o selo de Voz Audiovisual, ‘Tarde piaches’ aposta por ofrecer unha mirada fiel e diversa da realidade galega. Pola súa parte, as reporteiras Alejandra Tojo e Erea Hierro percorrerán as catro provincias para levarlle á audiencia as historias que están acontecendo en cada recuncho, dándolle voz aos seus verdadeiros protagonistas. 

Entrevistas variadas, divulgación e humor na súa estrea

O primeiro programa, o sábado 9 de maio, reflectirá con fidelidade a esencia deste novo formato, que busca equilibrar a divulgación co entretemento puro. A sobremesa abordará a menopausa, para continuar cunha terna de entrevistas que amosan a pluralidade e a sensibilidade do espazo.

Entre os convidados, ‘Tarde piaches’ contará co humorista Moncho Borrajo; con Esther Teijeiro, pioneira na denominación Ribeira Sacra e referente no cultivo ecolóxico; e con Paula Trigo, quen tras superar o transplante dos pulmóns por unha enfermidade rara, é todo un exemplo de superación. O resto de sorpresas reservaranse para quen se anime a descubrir esta nova aposta televisiva da fin de semana.

Santiago, 6.5.2026.-  Xabarin.gal súmase á conmemoración das Letras Galegas 2026 cunha proposta específica orientada ao público infantil, que combina divulgación cultural, aprendizaxe e entretemento en galego. A plataforma incorpora novos contidos que achegan ás novas xeracións as figuras clave da nosa literatura, reforzando así o seu papel como ferramenta de servizo público na promoción da lingua e da cultura galegas.

Neste contexto, estrea novos capítulos da serie ‘Os bolechas. As miñas primeiras Letras’, en que os populares personaxes se converten nos autores e autoras homenaxeados no Día das Letras Galegas para explicar quen foron e por que son referentes culturais. A serie inclúe tamén adaptacións de textos representativos, presentados dun xeito accesible, didáctico e atractivo para o público máis novo.

 A celebración arrinca este mércores día 6 co capítulo dedicado a Begoña Caamaño, figura homenaxeada neste 2026, xornalista e escritora. A través dunha das súas historias, en que aparece o personaxe de Morgana, a serie introduce o seu universo creativo ao público infantil. Entre os días 7 e 15 incorporaranse novos episodios dedicados a figuras como Castelao, Xela Arias, Eduardo Blanco Amor, Rafael Dieste, Ramón Cabanillas ou Luísa Villalta.

Ademais, Xabarin.gal continúa ampliando a súa oferta con novas estreas orientadas ao desenvolvemento educativo e creativo da infancia. O venres día 22 chegará á plataforma ‘Bloques de números’, unha produción da BBC dirixida ao público preescolar, en que personaxes que representan números viven aventuras vinculadas a conceptos matemáticos, facilitando a aprendizaxe temperá de forma lúdica e comprensible. O programa foi recoñecido internacionalmente cunha candidatura aos premios BAFTA na categoría de aprendizaxe.

Na última semana do mes estrearase tamén ‘Inventa que inventa’, un programa infantil galego que promove a creatividade e o pensamento crítico a través de inventos realizados por nenos e nenas. Co robot iMigui como fío condutor, cada episodio combina experimentación, divulgación científica e humor, fomentando a curiosidade, a imaxinación e a aprendizaxe activa.

Con esta programación, Xabarin.gal reafirma o seu compromiso coa infancia e co servizo público, ofrecendo contidos de calidade en galego que contribúen á educación, á transmisión de valores e ao coñecemento da cultura propia desde idades temperás.

Santiago, 29.04.2026.-  A plataforma AGalega.gal continúa avanzando na súa estratexia de posta en valor do patrimonio audiovisual galego coa estrea, este xoves 30, da nova sección ‘As figuras das Letras dende 1985’. Esta iniciativa supón un paso significativo na difusión e accesibilidade do arquivo da CSAG, ao ofrecer a cidadanía á maior recompilación audiovisual arredor das Letras Galegas realizada ata o momento.

A sección, integrada no espazo de cultura e divulgación da plataforma, reúne máis de 130 contidos que permiten percorrer a traxectoria das figuras homenaxeadas desde a creación da televisión pública galega ata a actualidade. Trátase dunha ferramenta clave para coñecer en profundidade o legado literario, intelectual e cultural destas personalidades, facilitando un acceso ordenado e contextualizado a materiais de gran valor histórico e divulgativo.

Ese mesmo día, AGalega.gal incorpora tamén o filme ‘Banco de Dave’, dispoñible durante 30 días. Baseado en feitos reais, narra a historia de Dave Fishwick, un empresario de orixe humilde que decide crear un banco comunitario para apoiar as persoas da súa contorna, nun relato de superación e compromiso social.

O venres 1, a plataforma estreará un especial do programa cultural ‘ZigZag’, dedicado á figura homenaxeada este ano nas Letras Galegas, Begoña Caamaño, afondando na súa traxectoria e contribución á cultura galega.

Na mesma xornada, incorporarase o filme ‘The Game’, dispoñible durante 15 días. A longametraxe presenta a Nicholas Van Orton, un multimillonario que leva unha vida aparentemente perfecta ata que recibe un peculiar agasallo do seu irmán: a participación nun exclusivo xogo que transforma a súa realidade nunha experiencia imprevisible e inquietante.

Reforza a aposta cultural tamén con ‘Resetéame’ e a nova temporada de ‘Léocho’

O sábado 2 chegará a estrea de ‘Resetéame’, un novo formato divulgativo que combina tecnoloxía e cultura. A través da intelixencia artificial, imaxes icónicas de figuras clave da cultura galega cobran vida para dialogar co presentador Juan Meniño, ofrecendo unha aproximación innovadora ás súas biografías e obras. O primeiro episodio estará dedicado a Castelao, cun percorrido polos lugares e momentos máis significativos da súa vida.

Ese mesmo día, estrearase tamén unha nova temporada de ‘Léocho’, programa conducido por María Canosa que convida a descubrir o universo da literatura galega dun xeito ameno e didáctico. A través de encontros con autores e profesionais do sector, a serie promove o hábito da lectura e visibiliza o ecosistema do libro en Galicia. Nesta nova entrega incorporaranse dous episodios.

Completarase a oferta da xornada coa incorporación do filme ‘Billy Elliot. Quero bailar!’, que estará dispoñible durante 14 días. Ambientada no contexto da folga de mineiros de 1984 no condado de Durham, a película relata a historia dun neno que descobre no ballet a súa verdadeira vocación, desafiando as expectativas familiares e sociais. Un relato inspirador sobre a superación persoal, o talento e a capacidade de seguir os propios soños fronte ás dificultades.

Con estas estreas, AGalega.gal reforza o seu compromiso coa difusión cultural, a innovación audiovisual e o acceso universal aos contidos de interese para a cidadanía.
 

Santiago, 10.03.2026.-       As películas apoiadas pola TVG ‘As liñas descotinuas’, e ‘Antes de nós’, e as series de animación ‘Pipo’ e ‘Bibopalula’, tamén participadas pola canle pública, foron recoñecidas cos premios especiais dos Mestre Mateo, na xuntanza dos finalistas dos galardóns celebrada en Lugo. 
 
O Premio Abanca ao impulso da sostibilidade recaeu na serie de debuxos animados ‘Bibopalula’ por integrar “de forma coherente, creativa e responsable” os valores da sostibilidade. E o Premio Deleite á promoción da lingua foi para a serie web ‘Pipo’ polo seu labor na creación de contidos audiovisuais que achegan o galego ás novas xeracións dun xeito “natural, creativo e próximo”.
 
No eido do cine, o galardón Martín Códax Rías Baixas, Fillo do Atlántico recaeu no filme ‘As liñas descontinuas’, que acumula 11 candidaturas aos Mestre Mateo, pola súa “sensibilidade e capacidade de proxectar unha Galicia auténtica e contemporánea”, en que a música ocupa un papel esencial. E o  Premio Especial do Público Galicia Calidade foi para a longametraxe ‘Antes de nós’, co actor Xoán Fórneas na pel de Castelao, que conta con 18 candidaturas nesta edición dos galardóns. Dirixida por Ángeles Huerta e con guión de Pepe Coira, esta película ofrece unha ollada íntima á figura do intelectual galeguista a través da relación coa súa muller, Virxinia Pereira.
 
60 candidaturas da CSAG aos Mestre Mateo
 
Televisión de Galicia conta con outros moitos filmes, programas e profesionais con candidaturas para o vindeiro 21 de marzo, ata un total de 60. Entre elas destacan as películas ‘San Simón’ e ‘Meu ilustrísimo amigo’; a longametraxe animada ‘Decorado’; as series ‘O home perfecto’ e ‘Punto Nemo’; a serie web ‘Bechos’; os espazos ‘Cos Pés na Terra’, ‘O videoclub’ e ‘Raíña-me’, e os comunicadores Xosé Ramón Gayoso, Lucía Veiga e Miguel Canalejo.

Santiago, 1.3.2026.- A cinta ‘Decorado’ logrou facerse co Goya á mellor película de animación na gala do cine español celebrada este sábado en Barcelona e suma un novo gran éxito na súa traxectoria. Dirixida polo coruñés Alberto Vázquez, ‘Decorado’ é unha fábula distópica, que combina humor e terror para construír unha alegoría sobre o control social e o artificio da vida contemporánea.

A película, que conta coa participación da Televisión de Galicia, está producida por Chelo Loureiro (Abano Producións), Iván Miñambres (Uniko), José María Fernández de Vega (The Glow) e Nuno Beato (Sardinha em Lata). ‘Decorado’ suma este premio Goya aos galardóns recollidos desde a súa estrea, nos premios Forqué e nos festivais “Fantastic Fest”, un dos festivais do xénero máis importantes do mundo, en Austin (Texas, EEU.UU.), e no Animation Is Film, de California.

As grandes triunfadoras da noite foron ‘Sirât’, do galego Oliver Laxe que obtuvo seis premios Goya e ‘Los domingos’ con cinco. A 40 edición dos Premios Goya foi presentada por Luis Tosar e Rigoberta Bandini no Auditori Fórum CCIB de Barcelona.

Televisión de Galicia segue apostando polo cine galego e confirmando cada ano a súa participación en novos proxectos. ‘Decorado’ foi unha das cintas seleccionadas na convocatoria de apoio ao cine do 2024. Con guión de Alberto Vázquez e Francesc Xavier Manuel, ‘Decorado’ é unha produción de Abano Producións, Uniko, The Glow, María y Arnold A.I.E e Sardinha Em Lata. O proxecto conta co respaldo de TVG, RTVE, ETB, Movistar Plus+, ICAA, Agadic, a Deputación de Badaxoz, o Goberno Vasco e a Deputación Foral de Biscaia.

Santiago, 27.02.2026.–  Televisión de Galicia e Radio Galega foron recoñecidas polo seu apoio constante á VIG-BAY, o histórico medio maratón que cada primavera desde hai 25 anos une deporte, paisaxe e emoción nun percorrido único entre Vigo, Nigrán e Baiona.

A popular proba, referente do atletismo galego, celebrou este venres o aniversario cun acto en Vigo que reuniu os colaboradores, patrocinadores e medios de comunicación que fixeron posible a súa evolución e consolidación ao longo de dúas décadas e media. 

Xoán Galán, xefe de Deportes da Corporación, recolleu a distinción en nome da CSAG, agradecendo o recoñecemento e reafirmando o compromiso da radio e televisión públicas co deporte galego e cos grandes eventos que promoven valores de participación, saúde e comunidade.

Durante este tempo, os medios públicos galegos acompañaron cada edición da carreira, levando ás pantallas e ás ondas non só a competición deportiva, senón tamén as historias de superación, esforzo e espírito colectivo que definen a VIG-BAY. Un labor de difusión que contribuíu decisivamente a reforzar a súa proxección e a convertela nunha das citas deportivas máis queridas do calendario do atletismo galego.