CRTVG Viva

Santiago, 19.05.2025.-  A plataforma dixital AGalega.gal renova unha semana máis a súa oferta de contidos con propostas que combinan humor, talento galego, cine internacional e  creatividade. A peza máis destacada da semana é a estrea de ‘Alicia fai cousas’, a curtametraxe asinada por Ángel Santos que fixo historia no Festival de Cans 2023 ao acadar catro galardóns principais (Mellor curtametraxe de ficción, dirección, guión e protagonista feminina). A curta, dispoñible desde o mércores 21, presenta a historia de Alicia, unha moza que quere ser actriz e que acaba mergullándose nunha escena que a obsesiona, ata que o aparente realismo da historia convértese noutra cousa.

Tamén terá un protagonismo destacado ‘Mataría’, a irreverente microserie de humor protagonizada por Pedro Brandariz, da que se poderá ver este luns 19 a súa derradeira temporada. A ficción ofrece unha crítica mordaz ás crises cotiás e aos absurdos do mundo moderno a través dun antiheroe moi peculiar que, dunha maneira tan esaxerada como cómica, ‘elimina’ as fontes da súa frustración diaria.

No eido cinematográfico, AGalega.gal ofrece catro longametraxes de referencia que se irán incorporando á plataforma ao longo da semana: ‘Captain Fantastic’ (martes 20), unha historia sobre crianza alternativa e contracorrente; ‘Coda’ (xoves 22), unha viaxe de superación e memoria a través da música; e ‘Premonición’ (venres 23), un thriller sobrenatural protagonizado por Cate Blanchett. O sábado 24 engádese ao catálogo ‘Houbo unha vez en América’, un clásico do cine de mafias dirixido por Sergio Leone, dispoñible durante 7 días. A noite do sábado tamén traerá un novo episodio da ‘Sala G’, dispoñible tras a súa emisión en TVG.

Para pechar a semana, este domingo pasado chegou un novo capítulo de ‘Galician Friki’, o videopodcast que segue a explorar o universo friki desde unha ollada galega e divertida. Nesta entrega, mergulla os usuarios nunha arrepiante festa otaku chea de ‘cosplayers’, descubrirase o Garaxe Hermético como escola de banda deseñada e coñecerase a Lidia Veiga, actriz que se define a si mesma como unha “friki palleirana”. 

Continúa tamén dispoñible en AGalega.gal a sección específica dedicada ás Letras Galegas 2025 que reúne, entre outros contidos, o documental ‘Pandeireita-tok’; as series ‘Se canto é porque quero’ e ‘Non canto por cantare’; o documental ‘Dorothè na vila’; o Especial das Letras de ‘Zigzag’, o ‘Concerto da Letras’ do CCG, así como o novo espazo dixital sobre lingua ‘Bótalle azucre’ e os máis de 200 capítulos de ‘Alalá’.
 

Santiago, 17.05.2025.- Os servizos dixitais da CRTVG son os máis consumidos de entre todos os entes autonómicos de España, e seguen a medrar. Só en Instagram, G24 chegou a 2 millóns de persoas no último mes, con case 40 millóns de reproducións nas últimas catro semanas. E en TikTok o último mes supuxo 2,3 millóns de impactos, con 15 millóns de reproducións dos seus vídeos.

Neste contexto, e no Día das Letras Galegas, nace un novo servizo informativo: G24play, pensado especialmente para o consumo en teléfonos móbiles de noticias en formato de vídeos moi curtos e directos. Esta nova canle ten a peculiaridade de que dota a Corporación de autonomía de manobra sobre os grandes operadores foráneos. G24Play é unha web e unha app propia, que non depende das normas nin dos algoritmos programados polas grandes corporacións tecnolóxicas mundiais de comunicación como X, TikTok ou Instagram.

G24Play é unha nova forma de informarse en galego sobre todo o que acontece en Galicia e no mundo de xeito moi sinxelo e moi doado de compartir nas redes e nas apps de mensaxería. A nova plataforma recollerá as principais noticias de G24, o portal informativo da canle pública galega, e adaptaraas a un formato vertical, con subtitulado e de curta duración.

G24play será accesible desde www.g24.gal ou directamente en G24play.gal, con app accesible de momento para Android, e que estará dispoñible en en iOS proximamente.

………………………………..

Arrastra e comparte, G24Play

Santiago, 19.05.2025.-  Elegancia dos pés á cachola. Isto é o que haberá hoxe en ‘Cos pés na terra’ (22:40 h), que coñecerá a Julia, artesá especializada na fabricación de sombreiros inspirados no noso baile e traxe tradicional.

Por outro lado, o programa proporalles aos espectadores da TVG comer ‘shiitakes’ no aloxamento rural de Alejandro, que restaurou a casa de seu avó. Un proxecto que comparte coa súa compañeira María nun lugar cheo de historias ben curiosas e con bo sabor.

Ademais, ‘Cos pés na terra’ visitará a David no seu paraíso na aldea da Tellada,  que comparte coas súas ovellas, galegas, por suposto, un rabaño ben numeroso, por máis que non saiba exactamente cantas ten.
 

Santiago, 13.05.2025.- A CRTVG celebrou este martes na Cidade da Cultura de Santiago a gala de entrega dos IV premios escolares DígochoEu, unha gran festa da lingua en que se coñeceron os centros educativos gañadores deste certame de vídeos en galego. Ao evento acudiron arredor de 500 escolares, os seus mestres e familiares, así como o conselleiro de Cultura, Lingua e Xuventude, José López Campos, o secretario xeral da Lingua, Valentín García Gómez; o director de Innovación da CRTVG, José Pereira, e Xaime Arias, director de Proxección Social. A gala foi presentada por Esther Estévez e polo reporteiro da TVG Óscar Cruz.

    A Televisión de Galicia emitirá a gala na súa programación especial o Día das Letras Galegas, o sábado 17 de maio (12:00 h) e tamén quedará dispoñible na plataforma dixital AGalega.gal.

    Na categoría de Educación Primaria, o premio de Ouro foi para o CEIP Sagrada Familia da Coruña, co vídeo ‘Climatoloxía’; o de Prata para o CEIP As Bizocas do Grove, que presentou o vídeo ‘Mariscos e peixes’, e o de Bronce para o CEIP San Xoán de Filgueira (Ferrol) por ‘Expresións ferrolás’. En Educación Secundaria resultaron gañadoras as propostas do CPI Plurilingüe O Cruce de Cerceda, coa peza ‘Goza coa túa lingua’, que levou o premio de Ouro; do IES Fontem Albei (A Fonsagrada), polo vídeo ‘Foliada’, que gañou o premio de Prata, e do IES Eduardo Pondal de Ponteceso, coa peza ‘Expresións da Costa da Morte’, gañadora do premio de Bronce.

    O xurado desta convocatoria 2024/2025 estivo formado por María Manuela Leis Cambeiro, asesora docente da secretaría de Política Lingüística da Xunta de Galicia, e por Carla Núñez e Marcos López, creadores de contido dixital baixo a marca Todo mal, que elixiron os gañadores pola calidade lingüística e expresividade dos vídeos, a súa orixinalidade e a innovación do contido. O concurso conta co patrocinio da Secretaría Xeral da Lingua e a colaboración de Gadis.

    DígochoEu é un proxecto da CRTVG que leva desde 2020 traballando a prol do galego, cun especial impacto nas xeracións máis novas e un gran éxito nas redes sociais, nas que se publican os vídeos e se explican dúbidas sobre o uso correcto da lingua. A comunidade construída arredor do ‘DígochoEu’ tivo, desde os seus comenzos, unha acollida sen precedentes na comunidade educativa.

Santiago, 12.05.2025.-  A CRTVG anda á procura da melodía deste verán coa novena convocatoria do certame ‘Canción do verán’, que ten como obxectivo apoiar a música en galego e descubrir novos talentos. O premio, 1.500 euros e a difusión do tema nas canles da TVG e a Radio Galega, será para un tema inédito e orixinal escrito e cantado en lingua galega.
 
No proceso de selección o xurado valorará a orixinalidade, a calidade técnica e o acompañamento dun vídeo musical. O veredicto coñecerase o 12 de xuño. As bases do certame poden consultarse na web da Corporación (https://www.crtvg.gal/w/bases-concurso-canción-do-verán-2025-).
 
Os intérpretes e grupos interesados en participar teñen ata o 8 de xuño para enviar as propostas, que non deberán exceder dos 2 minutos de duración e que poderán ir acompañadas dun vídeo musical. As cancións deberán enviarse en formato mp3 a canciondoveran2025@crtvg.gal, nun correo cos datos dos participantes e remitilas en formato mp4, no caso de presentar un vídeo.    
 
A canción gañadora desta edición sucederá a ‘Vaivén’, o tema elixido a edición pasada, do artista de Tomiño Gface.

Santiago, 09.05.2025.-  A CRTVG volve ser altofalante da celebración do Día das Letras Galegas cunha programación especial arredor da poesía popular oral e das figuras homenaxeadas este ano, as cantareiras Adolfina e Rosa Casás Rama, Eva Castiñeira e as Pandeireteiras de Mens -Manuela Lema Villar e Prudencia e Asunción Garrido Ameijende-. A TVG e a G2 achegarán, a través de documentais, entrevistas e pezas recuperadas do Arquivo sonoro e audiovisual, a extraordinaria contribución do cancioneiro popular á cultura galega.

Os medios públicos farán un completo seguimento informativo dos actos conmemorativos do día 17. Os informativos e programas da CRTVG garantirán a cobertura completa da actualidade. O magazine ‘Galicia por diante’ da Radio Galega modificará a súa estrutura habitual e emitirase en colaboración co ‘Diario cultural’, cubrindo en directo os actos institucionais, como o pleno extraordinario da RAG e o acto oficial da Xunta de Galicia. Tamén contará con entrevistas a destacadas figuras da cultura galega.

O cultural ‘ZigZag’ emitirase no Día das Letras Galega na primeira canle da TVG. O equipo de cultura elaborou un monográfico especial sobre as cantareiras, recuperando a súa obra e vida no seu contexto histórico e cultural. O espazo contará coa participación de músicos, familiares, amigos, académicos e estudosos do cancioneiro popular, e abordará a pegada da poesía popular oral na xente máis moza e nas novas correntes musicais.

Para multiplicar a difusión, as canles dixitais e as redes sociais da CRTVG faranse eco da programación e da actualidade da semana. E a efeméride será, como cada ano, protagonista a nivel institucional dunha das #AcciónsG anuais dentro da Responsabilidade Social Corporativa da CRTVG.

‘Pandeireta-tok’, unha peza sobre a música tradicional vista polos mozos e os seus novos medios de difusión, así como a serie documental ‘Os nomes da nosa terra’ (A Illa de Arousa, A Serra do Cando, Rodeiro, Baiona) son algúns dos contidos previstos na TVG, xunto coa produción da Real Academia Galega ‘Se canto é porque quero’.

A voz e a música das homenaxeadas e do cancioneiro popular galego resoarán na Radio Galega grazas aos fondos do Arquivo Sonoro da CRTVG e ás colaboracións con institucións culturais. O espazo ‘Diario cultural’, nas súas edicións de mañá e tarde, emitirá entrevistas e reportaxes sobre a pegada da poesía popular e a contribución da música tradicional á preservación do patrimonio cultural de Galicia. A programación afondará no perfil das homenaxeadas, no fenómeno das pandeireteiras en toda Galicia e na evolución das coplas ata as novas manifestacións artísticas actuais. Ademais, emitirase un ‘Diario cultural’ especial, o sábado 17 de maio.

AGalega.gal estreará o venres 16 a canle específica ‘Letras Galegas 2025’ que estará dispoñible durante un mes e que reunirá, entre outros contidos, o documental ‘Pandeireita-tok’; as series ‘Se canto é porque quero’ e ‘Non canto por cantare’; o documental ‘Dorothè na vila’; así como o Especial das Letras de ‘Zigzag’ e o Concerto da Letras do CCG. Sumaranse tamén o novo espazo dixital sobre lingua ‘Bótalle azucre’ así como os máis de 200 capítulos de ‘Alalá’.

Así mesmo, quedará tamén dispoñible a gala de entrega dos Premios Escolares DígochoEu 2025, que se celebrará o martes 13 de maio na Cidade da Cultura, e que tamén emitirá a TVG o sábado 17. Pola súa banda, a plataforma de audio AGalegaAudio.gal incluirá tamén unha sección especial dedicada ás Letras Galegas.

AGalega.gal tamén estreará a miniserie documental ‘Canta, miña compañeira’, que explora a evolución da música popular a través das mulleres que a mantiveron viva, celebrando o seu rexurdir nos torreiros do século XXI. Esta serie, dirixida especialmente a un público mozo de entre 15 e 35 anos, conecta o pasado co presente e serve como unha guía para redescubrir a nosa identidade musical. 

‘O corno’, ‘O corpo aberto’ e ‘Eroski Paraíso’, os sábados á noite

As noites dos sábados 10 e 17 de maio, son para o cine galego. TVG programa no prime time ‘O corno’ gañadora da Cuncha de Ouro en San Sebastián no 2023, e ‘O corpo aberto’, a cinta triunfadora nos Premios Mestre Mateo 2023. E a G2, o mesmo sábado 17, emitirá ‘Eroski Paraíso’. ‘O home e o can’, ‘Lúa vermella’ ou ‘Unicorn wars’ son outros títulos que se poderán ver ao longo da semana.

Concerto das Letras do Consello da Cultura Galega

A programación especial inclúe a emisión do ‘Concerto das Letras’ do Consello da Cultura Galega. A G2 vai emitilo o propio día 17, no prime time, e tamén quedará dispoñible na plataforma AGalega.gal. O concerto estará a cargo de Do Bertau, unha formación efémera coordinada por Richi Casás e creada expresamente para esta ocasión. Integrada por 11 artistas de distintos eidos musicais, Do Bertau interpretará unha ducia de pezas dos cancioneiros para ofrecer, cunha envoltura de jazz, muñeiras, comparsas, xotas, pasodobres e outros tipos de cantos tradicionais de diferentes zonas de Galicia.

Documentais e música tradicional, na G2

A celebración das Letras Galegas vertebra a programación da G2 xa desde o luns 12 coa estrea dos documentais ‘Dorothé na vila’ que narra a experiencia de dous mozos que inician unha viaxe tras os pasos da musicóloga suíza Dorothé Schubarth para descubrir as voces que ela gravou hai 40 anos en Galicia; e ‘Non canto por cantare’ (estrea no prime time do martes 13) serie que explora en seis episodios a evolución da música popular galega a través das mulleres que a mantiveron viva e celebra o rexurdir do folclore nos torreiros do século XXI, conectando o pasado co presente nunha guía para redescubrir a nosa identidade musical.

A ‘noite da música’ incluirá tamén varios capítulos especiais do programa de musica tradicional galega ‘Alalá’ que salientan o labor das cantareiras na transmisión da lírica popular, tal como recoñece a RAG dedicándolles o Día das Letras Galegas deste ano. 

Santiago, 08.05.2025.- Faltan catro xornadas para que remate a Primeira División de fútbol. O Celta afronta o último mes do campionato clasificado na sétima posición, que conduce á Europa League. As contas do equipo que prepara Claudio Giráldez pasan por gañar os dous partidos que restan en Balaídos e se cadra sumar algún punto nos desprazamentos a San Sebastián e Xetafe.

Este sábado, desde as 15:45 h, Gustavo Varela, Tomás Alonso e Roberto Lago contarán o encontro que enfronta ao Celta co Sevilla no estadio vigués. Os espectadores poderán seguir a emisión a través da primeira canle da Televisión de Galicia e da plataforma AGalega.gal, coa previa máis completa e os noventa minutos de xogo.

No descanso, o Xabarín da Televisión de Galicia saltará o céspede de Balaídos para celebrar os 40 anos da TVG, que se cumpren neste 2025, e os 40 anos de retransmisións e apoio ao equipo celeste. En canto remate o partido comezará un programa especial conducido por Óscar Benito, para ofrecer as declaracións dos principais protagonistas e as conferencias de prensa dos dous adestradores.

Máis deporte na fin de semana

Durante a fin de semana o deporte tamén estará presente na programación da segunda canle, a G2, ademais da plataforma AGalega.gal. O sábado, a partir das cinco da tarde, o pavillón municipal do Porriño acolle a ida da final da European Cup de balonmán entre o equipo galego e o Valur de Islandia.

Ao remate chegará o fútbol da Primeira RFEF, coa visita do Club Deportivo Lugo ao Nástic de Tarragona no Nou Estadi. A goleada encaixada ante o filial do Barcelona provocou o cesamento de Toni Seligrat como adestrador, coa chegada ao banco de Álex Ortiz procedente do filial da Terceira RFEF.

Xa o domingo, a mañá estará protagonizada polo fútbol da Terceira Federación, co remate da liga regular. A Federación unificou o horario dos nove partidos, programados para as 12:00 horas. As citas chave son o Arousa-Alondras e Betanzos-Noia, no que está en xogo a quinta praza que conduce á promoción de ascenso á Segunda RFEF. A partir das 14:00 h, o motocrós tomará o mando desde o circuíto de Lugo, onde se disputa unha nova proba do Mundial MXGP, coa segunda manga prevista para as cinco da tarde. A xornada deportiva rematará o domingo ás 19:00 h desde o estadio de Riazor, onde o Fabril Deportivo inicia a fase de ascenso á Primeira RFEF recibindo ao UCAM Murcia.

‘En xogo’

O domingo pola noite, contra as 22:25 h, o equipo deportivo da Televisión de Galicia resume na G2 todo sucedido na xornada futbolística cunha nova edición do programa En Xogo. Os espectadores poderán ver amplos resumes dos partidos Celta-Sevilla, Spórting de Xixón-Deportivo e Tenerife-Rácing de Ferrol, ademais do clásico disputado en Montjuic entre o Barcelona e o Real Madrid. Os goles da Primeira e Terceira RFEF, xunto á fase de ascenso desde a Segunda RFEF, completarán a oferta nocturna.

Deportes nos telexornais

De luns a domingo, a TVG dedica amplos espazos de información deportiva nos distintos telexornais e no matinal ‘Bos días’ coa última hora dos equipos galegos que participan nas competicións profesionais de fútbol e baloncesto. Durante os sete días da semana os medios públicos galegos tamén informan do mundo do deporte na plataforma G24.gal e na conta de X @EnXogo_tvG2.

Santiago, 08.05.2025.-     A semana deportiva na Radio Galega e AGalegaAudio.Gal comeza este xoves. A partir das 20:30 h., Roberto Carlos Carballo conduce a retransmisión do partido da Liga ACB de baloncesto entre o Basquet Coruña e Barcelona, desde o Coliseum. Pase o que pase, o equipo herculino evitará o descenso matemático á Primeira Federación e se fose quen de dar a sorpresa mantería mínimas opcións de permanencia. O equipo de Epi confía en repetir a fazaña da primeira xornada, cando derrotara o Real Madrid cunha xogada de catro puntos nos segundos finais.

O venres, tamén desde as 20:30 h, o baloncesto volverá ser protagonista, desta volta coa última xornada da competición regular na Primeira Federación. O Obradoiro xoga en Burgos ante o Tizona co obxectivo de acadar o triunfo e asegurar o factor cancha nos cuartos de final polo ascenso á ACB ante o Palencia. Mentres, o Ourense viaxa a San Sebastián para medirse ao Gipuzkoa coa ilusión de gañar e meterse nos play off.

Xa o sábado, a edición informativa das 14:20 h emitirase desde o circuíto de Lugo, na previa da disputa do Mundial de motocrós MXGP.

Ás 15:00 h, Xoán Galán dirixirá as retransmisións dos partidos Celta-Sevilla e Sporting de Xixón-Deportivo, que coinciden en franxa horaria. Para o Celta, o encontro é decisivo para seguir mantendo a sétima praza que conduce á Europa League. O rival chamou a Joaquín Caparrós para escapar da zona perigosa e tras dúas xornadas aínda non foi quen de acomodarse na zona tranquila. Pola súa banda, o Deportivo celebrará no Molinón a permanencia matemática na Segunda División ante un rival que logo de cesar ao galego Rubén Albés mellorou en resultados e semella estar xa fóra de perigo. Así e todo necesita polo menos tres puntos máis para certificar a continuidade tras a derrota do pasado luns en Castelló.

O fútbol de Primeira RFEF completará a sesión da tarde, coa visita do Lugo a Tarragona para medirse ao Nástic e o enfrontamento entre o Tarazona e o Ourense C. F.

O domingo, a sesión matinal comeza ás 11:45 horas con atención especial ao Deportivo-Sevilla, no que está en xogo para o cadro coruñés a opción de conquistar a permanencia matemática na Primeira División feminina. As outras citas son os encontros da Primeira RFEF Amorebieta-Celta Fortuna e Osasuna B-Arenteiro, xunto ao final con horario unificado da Terceira RFEF.

O baloncesto será outro dos argumentos, coa visita do Basquet Coruña ao Bilbao Basquet na Liga ACB. A partir das 15:00 h, o interese estará no Pazo de Lugo, onde o Breogán recibe ao Real Madrid. Ademais haberá clásico na Primeira en Montjuic, mentres na Segunda o Racing de Ferrol, xa descendido, visita a outro equipo que está ao bordo da caída, o Tenerife.

Audio nas televisións

Esta xornada, os espectadores poderán escoitar as retransmisións da Radio Galega nas opcións de audio dos seus operadores de televisión. Os partidos seleccionados son Celta-Sevilla, Sporting de Xixón-Deportivo, Basquet Coruña-Barcelona e Breogán-Real Madrid.

#GaliciaEnXogo

Este sábado o motor terá unha ampla presenza no proxecto que leva o cancelo de #GaliciaEnXogo. Ás once da noite Rodrigo Pérez falará cos principais protagonistas da proba do mundial de motocrós programada para o domingo no circuíto de Lugo. O espazo tamén recollerá os resultados do Rally da Mariña, puntuable para o campionato galego. Ás 23:30 horas Toni López actualizará, como cada sábado, a actividade dos galegos que preparan os Xogos Olímpicos de 2028.

Santiago, 07.05.2025.- Coincidindo co inicio do conclave no que os cardeais reunidos na Capela Sixtina escollerán o novo Papa —un proceso marcado polo segredo, os símbolos e a transcendencia histórica—, a CRTVG despregará un dispositivo especial en televisión, radio e plataformas dixitais para informar en tempo real sobre este acontecemento de alcance global.

A cobertura incluirá conexións en directo desde o Vaticano, entrevistas con expertos, análise de contexto e voces representativas da Igrexa e do mundo académico, co obxectivo de achegar á audiencia galega as claves dunha elección que marcará o futuro da Igrexa católica.

No momento en que haxa fumata branca no Vaticano, a Televisión de Galicia ofrecerá un Especial que contará coa participación de Alberto Varela, xefe de Informativos da Radio Galega. Entre os convidados confirmados figuran o xornalista vaticanista Juan Vicente Boo, o Arcebispo Emérito de Santiago Julián Barrio, o Arcebispo de Santiago Francisco José Prieto, o Arcebispo de Mérida-Badaxoz José Rodríguez Carballo e o bispo de Ourense Leonardo Lemos. Tamén intervirán o teólogo Pedro Castelao (Universidade de Comillas), a relixiosa Silvia Rozas, secretaria xeral da CONFER e o diplomático vaticano Francisco Froján Madero. O enviado especial da CRTVG, Marcos Sueiro, informará en directo desde Roma, onde se prevén entrevistas con representantes eclesiásticos destacados.

A Radio Galega ofrecerá o especial ‘Habemus Papam’ desde o Estudio Multimedia da emisora, coa xornalista Cristina García narrando o resultado do conclave desde o Vaticano. Participarán como convidados neste especial Milagros Otero, Silvia Rozas, Pedro Castelao, o xurista Celso Alcaina, o analista Roberto Blanco Valdés, representantes do episcopado galego e docentes como Francisco Buide e Luis Rodríguez Patiño. Tamén está prevista unha intervención do colexio La Merced de Sarria, actualmente de visita en Roma.​​

Toda a cobertura poderá seguirse tamén a través da plataforma dixital G24.gal, que ofrecerá actualizacións constantes, vídeos, análises e os momentos clave do conclave e da eventual fumata branca que anunciará o novo pontífice.

Santiago, 02.05.2025.-    Coa chegada este venres a Xabarin.gal da serie de animación ‘Moby Dick e o segredo de Mu’, comeza un mes de maio cheo de estreas na plataforma dixital infantil da CRTVG. Esta ficción ten como protagonista a Romy, un valente rapaz de 12 anos que debe viaxar arredor do mundo na busca de 24 pedras sagradas ocultas por unha civilización perdida para que lle sexa revelado ‘o segredo de Mu’. Hoxe poranse a disposición 13 capítulos.

O seguinte venres, 9 de maio, Xabarin.gal incorporará ao seu catálogo ‘Os Bolechas. As miñas primeiras letras’, en que a familia creada por Pepe Carreiro repasa algúns dos nomes máis grandes da nosa literatura para ensinarllos á rapazada de xeito máis divertido.

O 16 de maio, véspera do Día das Letras Galegas, estrearase a segunda temporada da serie de animación galega ‘Bechos’. Nela, o xabaril Xurxo, a raposa Catuxa, a vaca Margarida e a toupa Xiana quedan no parque para xogar todos os días. Coas súas historias, os espectadores máis pequenos aprenden o respecto pola natureza, a necesidade de reciclar e o valor da amizade.

Unha semana despois, o día 23, os cativos e cativas poderán gozar da serie de animación ‘Can cheirento’. O seu protagonista vive nun caldeiro do lixo, cheira a sardiñas e está cheo de pulgas. Ademais, é bastante parvo, pero ten un corazón que non lle cabe no peito e é puro optimismo e alegría. Vivirá as súas aventuras por París adiante. A serie está baseada nos libros de Colas Gutman, que xa venderon máis de dous millóns de copias en Francia e están traducidos a máis de 20 idiomas.

As estreas de maio en Xabarin.gal completaranse o venres 30 coa posta á disposición de novos capítulos de ‘Glumpers’, uns amigos que viven xuntos e cunhas personalidades que chocan constantemente, convertendo a súa casa nunha tremenda fonte de desastres que ocorren en cada episodio.

Santiago, 30.04.2025.-  A CRTVG ofrecerá a 15ª edición do Concerto das Letras Galegas, unha homenaxe ao canto tradicional organizada polo Consello da Cultura Galega (CCG), que terá lugar o 16 de maio en Carballo. O evento poderá seguirse en directo a través da web do CCG e emitirase o sábado 17, Día das Letras Galegas, na segunda canle da TVG. Ademais, quedará dispoñible na plataforma dixital AGalega.gal, reforzando así a oferta especial de contidos culturais da CRTVG nesta data sinalada.

Este concerto, con entrada libre, celebrarase no Pazo da Cultura de Carballo e destaca por poñer en valor a riqueza musical da comarca de Bergantiños a través dunha selección de cantos tradicionais galegos presentados cunha nova envolvente sonora. A proposta artística desta edición estará a cargo de Do Bertau, unha formación creada especificamente para esta ocasión, coordinada por Richi Casás e composta por 11 músicos e músicas de diversos ámbitos, cunha posta en escena contemporánea e inspirada na tradición.

A presidenta do CCG, Rosario Álvarez, xunto co alcalde da localidade, Evencio Ferrero, presentaron en rolda de prensa o programa desta cita, que fai un percorrido pola xeografía galega a través das melodías tradicionais cunha posta en escena contemporánea. Na rolda tamén participaron o director do Arquivo Sonoro de Galicia, Alejo Amoedo; a xefa de Comunicación Corporativa da CRTVG, Marta Fernández, e a concelleira de Cultura de Carballo, Maruxa Suárez.

“Sempre concibimos o concerto como un proxecto colaborativo e este ano puxemos aínda máis o acento no colectivo xa que, grazas á mestría de Richi Casás, créase unha banda efémera de 11 artistas que lle dá impulso a esta proposta” explicou na rolda Rosario Álvarez. O director do Arquivo Sonoro de Galicia destacou que, o Concerto das Letras Galegas “escolma nesta ocasión arredor dunha ducia de pezas do amplo legado recollido nos cancioneiros para ofrecer, cunha envoltura de jazz a cargo de Do Bertau, muiñeiras, comparsas, xotas, pasodobres e outros tipos de cantos tradicionais de diferentes zonas de Galicia”. Pola súa banda, Evencio Ferrero agradeceu na rolda a elección de Carballo para este concerto que “nos permite honrar á nosa tradición desde a comarca de Bergantiños, que ten unha fonda raigame de música tradicional con moitas persoas que serviron de fonte na que beberon os novos valores da música tradicional galega”. O concerto poderá seguirse en directo a través da web do CCG no día do concerto e “na segunda canle da TVG no marco da programación especial do Día das Letras Galegas e despois quedará a disposición da cidadanía na plataforma dixital AGalega.gal” explicou Marta Fernández.

Durante a presentación, a xefa de Comunicación Corporativa da CRTVG, subliñou tamén que “a CRTVG volve ser altofalante dunha celebración das Letras Galegas neste ano no que as protagonistas son a voz e a música das cantareiras e pandereteiras, que soarán na TVG, a Radio Galega e as plataformas AGalega.gal e AGalegaAudio.gal grazas aos fondos do Arquivo Sonoro e a colaboracións institucionais como a asinada co Consello da Cultura Galega”.

O programa

O Concerto das Letras Galegas arranca coa Comparsa de Mens, en Ordes, recuperada a través das gravacións clásicas feitas primeiro por Alan Lomax cando chegou a Galicia nos anos 50 enviado pola discográfica Columbia e, dúas décadas despois, pola musicóloga suíza Dorothé Schubarth. Séguelle unha xota de Maruxa das Cortellas, unha das máis sobranceiras informantes en Galicia do toque de pandeiro. No programa destaca tamén o Canto de Nadal de Rosa e Adolfina Casás, un dos poucos cantos deste tipo que se conservan en galego. Tamén se escoitaran as Mulleres de Gharghamala, un grupo de cantadoras e tocadoras de Mondariz que seguen mantendo viva a chama da tradición. Do sur da provincia de Pontevedra pasarase ao sur de Ourense para escoitar o canto de canteiros de Faramontaos, que nesta ocasión soará na voz de Tanea. Explica Richi Casás que “os canteiros en todas as culturas acompañaban o seu traballo con cantares rítmicos para acompasar o seu esforzo á hora de mover grandes pedras”. Na recta final do concerto escoitaranse dúas pezas de Cervantes, cantadas a capela nas voces das tres integrantes de Bouba Pandeireteiras sen o acompañamento da banda. Poñen o ramo ao concerto dúas pezas de Santa Mariña, unha xota e unha muiñeira recollidas por Dorothé Schubarth ás veciñas camariñás. 

O concerto insírese no marco dun acordo asinado hoxe entre o CCG e o Concello de Carballo. Pola súa parte, a CRTVG, que tamén asinou este mes un convenio de colaboración co Consello da Cultura Galega, súmase a esta iniciativa que abre a programación do Día das Letras Galegas, dando difusión á proposta tanto na súa grella televisiva como nas súas plataformas dixitais. As entradas de balde para o concerto estarán á disposición do público na billeteira do Concello (https://billeteira.carballo.gal/) a partir do xoves, 1 de maio.

Santiago, 16.04.2025.-   A presidenta do Consello da Cultura Galega (CCG), Rosario Álvarez, e o director xeral da Corporación Radio e Televisión de Galicia (CRTVG), Alfonso Sánchez Izquierdo, asinaron esta mañá un convenio de colaboración para a realización de actividades conxuntas que contribúan a fomentar e difundir a lingua e a cultura galegas. O convenio, cunha vixencia de dous anos prorrogables, posibilitará a emisión, entre outras actividades do CCG, do Concerto das Letras Galegas.

O acordo asinado esta mañá facilitará a promoción e difusión da lingua e a cultura galegas mediante a cobertura das actividades realizadas polo CCG a través das distintas canles e plataformas da televisión pública. Entre elas destaca o Concerto das Letras Galegas, unha proposta musical de carácter institucional coa que o CCG abre a programación do Día das Letras Galegas na véspera do 17 de maio, cun programa musical relacionado coa figura homenaxeada en cada edición. En cada concerto estréase unha peza encargada a un compositor galego a partir do legado da persoa ou entidade celebrada.

A décimo quinta edición deste concerto terá lugar o vindeiro 16 de maio en Carballo e estará dedicada ás cantareiras e á poesía de tradición oral. A CRTVG emitirá este concerto no marco da programación do Día das Letras Galegas.
 

Santiago, 13.04.2025.-  A Semana Santa 2025 chega cargada de novidades nas plataformas dixitais AGalega.gal e AGalegaAudio.gal, con estreas que inclúen desde unha microserie de humor ata videopodcasts históricos, ficción e contidos especiais para conmemorar estas datas festivas. O martes (15 de abril), estréase ‘Satélite Xabarín’, un videopodcast que orbita pola historia do icónico ‘Xabarín Club’, arredor das cancións e series que forman xa parte da memoria colectiva do país e que se poderán coñecer mellor da man das persoas que as protagonizaron. 

O primeiro episodio estará centrado en Herdeiros da Crus, grupo que viviu un cambio radical na súa carreira grazas ao programa infantil.  ‘Que ghallo é’ e ‘Íscalle lura’ foron éxitos instantáneos no ‘Xabarín Club’, e da noite á mañá os integrantes do grupo, uns rapaces do Barbanza, pasaron a ser estrelas que aínda seguen brillando. Tuchiño sobe ao ‘Satélite Xabarín’ para lembrar aquela época. ‘Satélite Xabarín’ estará dispoñible en formato audio e vídeo na plataforma AGalegaAudio.gal e tamén en AGalega.gal, e cada 15 días se lanzará un novo episodio.

Tamén o martes, AGalega.gal ofrecerá o terceiro capítulo de ‘Punto Nemo’, o thriller de ciencia ficción cuns personaxes que loitan por sobrevivir nunha illa chea de misterios e secretos. Coa trama cada vez máis intensa, o capítulo explora un misterioso envelenamento, segredos soviéticos e restos da estación MIR e unha serie de criaturas descoñecidas que poñen en risco a vida dos seus protagonistas. O episodio estará dispoñible durante 15 días.

O humor de ‘Mataría’, unha microserie protagonizada por Pedro Brandariz

Pero AGalega.gal estrea xa o luns a temporada completa de ‘Mataría’, unha microserie de humor protagonizada por Pedro Brandariz. Achega unha historia de comedia irreverente en que o personaxe principal, Pedro, un antiheroe anónimo, afronta as pequenas crises cotiás dun modo desmesurado. O personaxe central da serie ‘asasina’ das maneiras máis insospeitadas aquelas persoas que o alporizan no día a día. 

Amais, AGalega.gal poñerá o mércores á disposición do público as 25 tempadas de ‘Libro de familia’, unha das series clásicas da CRTVG, que narra a historia de tres familias galegas de distinta procedencia social na ficticia vila de Santalla nos anos 60. 

E para os amantes do cine, o xoves chega a película ‘Million Dollar Baby’, dirixida e protagonizada por Clint Eastwood, que estará dispoñible durante 30 días.

Unha sección especial dedicada ás procesións de Viveiro e Ferrol

Como peche da semana, o venres, AGalega.gal incorporará unha sección especial dedicada á Semana Santa 2025, con programas e retransmisións das procesións de Ferrol e Viveiro, entre outros contidos festivos destas datas.

Santiago, 11.04.2025.-  Televisión de Galicia ofrecerá  esta Semana Santa dúas das procesións máis emblemáticas do país: o Cristo da Misericordia de Ferrol, o Xoves Santo, e o Santo Enterro de Viveiro, o Venres Santo. Dúas citas clave do calendario relixioso galego que se poderán seguir en directo no espazo ‘Semana Santa ao Vivo 2025’ da canle pública galega.

O Xoves Santo, ás 23:00 horas, as cámaras da TVG trasladaranse a Ferrol para vivir a procesión do Cristo da Misericordia e a Virxe da Piedade, unha das máis multitudinarias da cidade. Máis de 1.100 confrades, 13 terzos, 6 bandas e 5 pasos participarán neste desfile que percorre o centro histórico da cidade, con saída e chegada na Igrexa das Dores. Este ano destaca a estrea do novo manto da Virxe da Piedade, elaborado no obradoiro de Enrique Carrascal grazas á recadación da confraría ao longo de dos anos. A retransmisión contará coa narración de María José Campo, xornalista relixiosa da Diócese de Lugo e directora e presentadora do espazo ‘Polo camiño da fe’, acompañada por expertos como a xornalista Marta Corral, quen achegarán detalles e curiosidades ao longo do percorrido. 

Ao día seguinte, o Venres Santo, a partir das 19:30 horas, a atención dirixirase cara a Viveiro, onde terá lugar a solemne procesión do Santo Enterro. Declarada Festa de Interese Turístico Internacional, esta cita rexistra a asistencia de preto de 10.000 persoas cada ano. Desde a Igrexa de Santa María, os pasos do Cristo Xacente, a Urna e a Virxe das Dores transitan polas rúas máis emblemáticas da vila nun ambiente de silencio e recollemento. A cobertura incluirá comentarios da xornalista María José Campo e expertos da Xunta de Confrarías de Viveiro, como o seu presidente José Veiga, ofrecendo unha ollada á simboloxía, historia e emoción deste acto.

Amais de ofrecer as procesións relixiosas, os magazines da TVG -’O termómetro’, ‘Quen anda aí?’ e ‘Hora galega’- realizarán durante toda a Semana Santa un seguimento en directo dos eventos máis destacados desde distintos puntos de Galicia.

A pé de rúa tamén a Radio Galega achegará o máis destacado da programación festiva galega nos seus distintos programas, e AGalega.gal habilitará o espazo ‘Semana Santa 2025’ na sección de ‘Programas’ da plataforma dixital, onde tamén se poderán ver as procesións despois da súa emisión na TVG, amais doutros contidos festivos. 

Santiago, 10.04.2025.-  A longametraxe ‘Romaría’, participada pola Televisión de Galicia, foi seleccionada para a competición oficial do Festival Internacional de Cinema de Cannes, que se desenvolverá entre o 13 e o 25 de maio. Esta reflexión sobre a memoria familiar, a terceira longametraxe de Carla Simón, tras ‘Alcarràs’ e ‘Estiu 1993’, estrearase nos cinemas o 5 de setembro e, posteriormente, emitirase na Televisión de Galicia e a través da plataforma AGalega.gal. 

Protagonizada pola debutante Llúcia Garcia Torras, xunto a Mitch e Tristán Ulloa, conta tamén no elenco con Celine Tyll, José Ángel Egido e as actrices galegas Miryam Gallego, Janet Novás e Sara Casasnovas. A historia comeza con Mariña (18), unha rapaza adoptada de pequena, que viaxa a Vigo para atoparse por primeira vez coa familia do seu pai biolóxico. A súa chegada tráelle de volta un pasado xa enterrado. Guiada polo diario da súa nai e a través dunha conexión especial co seu novo primo, Mariña descubrirá as feridas familiares e poderá por fin revivir a memoria fragmentada duns pais dos que apenas ten recordos. 

A cineasta segue explorando en ‘Romaría’ as relacións familiares inspirándose esta vez nas orixes da súa familia biolóxica paterna. Con esta historia, Carla Simón pretende recuperar o legado dunha xeración esquecida, que sufriu a adicción á heroína e a aparición dun novo virus coa estigma da sida.

Rodada en diferentes localizacións de Vigo, a película está producida por Elastica, en coprodución con Ventall Cinema, Dos Soles Media e Romería Vigo, A. I. E. Conta con financiamento do Goberno de España, Eurimages, l’Institut Català de les Empreses Culturals, cofinanciado pola Unión Europea coa subvención da Axencia Galega das Industrias Culturais - Xunta de Galicia, Filmförderungsanstalt (FFA), MOIN Filmförderung, Europa Creativa MEDIA, Comunidade de Madrid, Radio Televisión Española, Movistar Plus+, ZDF/ARTE, Netflix, 3Cat, Corporación Radio e Televisión de Galicia, mk2 films, Ad Vitam, The Post Republic e Piffl Medien. 
 

Santiago, 07.04.2025.-  A plataforma dixital AGalega.gal suma á súa grella esta semana novidades para todos os gustos. Un dos pratos fortes chega hoxe luns coa estrea da segunda tempada de ‘Merlí’, a premiada serie educativa que conquistou o público cun enfoque innovador sobre a filosofía. Todos os episodios estarán dispoñibles de contado para os usuarios da plataforma. A serie segue as ensinanzas de Merlí Bergeron, un profesor de bacharelato que estimula o pensamento crítico dos seus alumnos a través das teorías de grandes filósofos, desafiando normas e xerando debates intensos nas aulas e nos fogares.

Outro dos lanzamentos dixitais destacados é ‘Arborismos’ (venres, 11 de abril), unha serie documental dirixida por Cora Peña, que explora as características e curiosidades de seis especies arbóreas presentes no medio natural galego. Trátase dunha proposta divulgativa de interese para toda a familia, que poderá verse tanto en AGalega.gal como en Xabarin.gal.

O mércores (9), ‘Sons do mundo’ ofrecerá un percorrido polos momentos máis salientables do encontro internacional de World Music celebrado na Coruña. Unha proposta que achega ritmos e culturas de todo o planeta, amais de ser un escaparate das nosas músicas e artistas no exterior.

A semana continúa o martes (8) coa incorporación do segundo episodio de ‘Punto Nemo’, dispoñible durante 15 días. A emocionante serie sitúa os espectadores ante a loita pola supervivencia da tripulación do Pentokontors, tras un ataque pirata que os deixa varados nunha illa descoñecida.

A oferta cinematográfica da semana inclúe a partir do xoves (10) ‘Rams’, un drama australiano en que dous irmáns gandeiros enfrontados durante décadas deben unir esforzos para salvar os seus rabaños tras a chegada dunha doenza letal para as ovellas da súa comunidade. A película estará dispoñible durante 30 días.

E finalmente, o sábado (12) AGalega.gal estrea ‘A cidade perdida de Z’, unha cinta estadounidense baseada en feitos reais sobre a vida do explorador británico Percy Fawcett, quen dedicou a súa vida a buscar unha cidade lendaria na Amazonia. Esta fascinante historia de exploración e misterio estará dispoñible durante 7 días.

Santiago, 3.4.2024.-   A docuserie ‘Insulae, crónica da nosa historia’ de Radio Televisión Canaria foi galardoada co premio Pello Sarasola 2024 como mellor programa televisivo da Federación de Organismos de Radio e Televisión Autonómicas (FORTA), nunha cerimonia celebrada onte, día 2 de abril, en Palma, organizada por IB3. 

‘Insulae, crónica da nosa historia’ é unha produción audiovisual en formato docuficción que aborda en trece capítulos os episodios históricos e as biografías das personalidades máis relevantes da historia das Canarias. Ofrece unha visión profunda da historia das illas, que combina elementos históricos con ficción para capturar a esencia da cultura insular. 

A X edición dos premios Pello Sarasola, creados en honra ao destacado profesional da radiotelevisión vasca, foi organizada por IB3, que coincide coa celebración do seu 20 aniversario e á vez co vixésimo da comisión de Televisión de FORTA, un organismo clave para a coordinación e o desenvolvemento das televisións autonómicas. 

Neste senso, o director xeral de IB3, Marc González, dirixiuse aos profesionais do sector audiovisual, representantes das diferentes televisións autonómicas e figuras destacadas da cultura e a comunicación que asistiron ao acto. Lembrou que “a través da colaboración e o traballo conxunto, fortalecemos a nosa presenza no panorama audiovisual e reforzamos a nosa misión de ofrecer unha comunicación de proximidade de calidade”.

Durante o acto tamén se entregou o premio Honorífico a Á Punt pola cobertura informativa da DANA do pasado 29 de outubro. 

Doce candidaturas 
Nesta edición optaron ao galardón as doce televisións que integran FORTA; cada unha presentou un só programa emitido durante o 2024. IB3 Televisión presentou a candidatura de ‘La Millor Festa’: un concurso de verán en que oito vilas competían para saber cal ofrecía a mellor verbena das illas. 

En canto ao resto de candidaturas ao mellor programa que optaron ao premio, fixérono en diferentes modalidades: series, documentais e programas divulgativos e de entretemento.

A continuación detallamos todas as candidaturas e respectivas televisións: A historia de Carles Porta sobre os misterios da montaña de ‘Tor’ foi a docuserie pola cal apostou 3CAT. 

Canal Sur presentou con ‘Magna’, a retransmisión da procesión coa cal se pechou o II Congreso Internacional de Irmandades e Relixiosidade Popular en Sevilla, o 8 de decembro de 2024. 

O programa divulgativo e de entretemento de Telemadrid ‘Cómo funciona’ ofrece unha mirada interesante sobre os mecanismos que fan funcionar varios aspectos da nosa vida cotiá. 

A docuserie ‘Somos porque fuimos’ de AragonTV explora as raíces da historia e as tradicións de Aragón, e mostra a importancia do pasado no presente. 

À Punt destaca ‘A la Saca’, un game show cheo de emoción e diversión, que achega un formato dinámico e entretido para o público. 

O programa infantil ‘Equipo planeta’ de CMM combina entretemento e educación, e convida os máis pequenos a coñecer o mundo que os rodea mentres se divirten. 

‘Itsatsita’, unha instaserie musical en éuscaro de EiTB Media, é unha produción fresca e innovadora que fusiona a música cunha narrativa moderna para atraer un público novo. 

A serie documental ‘Curando o mundo’ de CRTVG lévanos a unha viaxe por descubrir iniciativas que cambian o mundo a mellor, a través do uso da saúde, a ciencia e a solidariedade. 

Finalmente, o docureality ‘Móntate películas’ de RTPA ofrece unha mirada entretida aos procesos de creación cinematográfica, en que os participantes se ven inmersos no mundo do cinema e compiten para ver quen pode crear a mellor película. 

Dous premios Pello Sarasola para IB3 

A Federación de Organismos de Radio e Televisión Autonómicas (FORTA) premiou IB3 Televisión en dúas ocasións. O ano 2018, ‘Treufoc’, a serie de televisión policial producida por IB3, levou o primeiro galardón. Catro anos despois, o premio foi para a serie de ficción ‘Pep’ en recoñecemento da súa visibilización da enfermidade do alzhéimer con sensibilidade e sentido de servizo público a produción. 

Con estes premios, FORTA reafirma a aposta para a excelencia na produción audiovisual e o papel fundamental das televisións autonómicas na promoción da cultura e a información de proximidade. 

Santiago, 02.04.2025.-  A plataforma dixital AGalega.gal estrea hoxe unha nova serie documental, ‘Galicia diversa’, un proxecto que foi seleccionado na última convocatoria de contidos dixitais da CRTVG. Esta nova produción busca ofrecer unha visión ampla e sen prexuízos sobre a realidade das persoas con discapacidade e diversidade funcional en Galicia. 

A serie, producida por Miramemira e composta por cinco episodios de 12 minutos, estrutúrase a partir de testemuños de persoas con diversidade funcional, así como dos seus familiares, profesionais e voluntarios, que traballan neste eido. Ademais, abordará temas fundamentais como a educación, o emprego, a atención terapéutica e o acceso á cultura e ao deporte para as persoas con necesidades especiais.. 

A presentación oficial de ‘Galicia diversa’ tivo lugar este mércores, ás 11:00 horas, no centro sociocultural O Ensanche de Santiago. O evento contou coa participación dos directores da serie, Damián Varela e Manuel Darriba; do director de Proxección Social da CRTVG, Xaime Arias; da representante da plataforma AGalega.gal María Sabucedo, e de figuras destacadas do ámbito da diversidade funcional, como os atletas paralímpicos Jesús Cabo e Ramona Seijo. Tamén estiveron presentes o presidente de Fademga Plena Inclusión, Eladio Rodríguez, e a presidenta da Federación de Asociacións de Persoas Xordas de Galicia, María Alonso. 

‘Galicia diversa’ nace coa intención de darlle voz e visibilidade a un colectivo tan numeroso como o das persoas con discapacidade e diversidade funcional, buscando que se vexan reflectidas dun xeito digno e exento de paternalismo. O próximo 5 de abril levarase a cabo unha segunda presentación en Sarria (Lugo), ás 18:00 horas, na Casa da Cultura.
 

Santiago, 31.03.2025.-  A plataforma dixital AGalega.gal continúa reforzando a súa oferta de contidos coa incorporación de novas producións galegas e de cinema internacional. Esta semana destacan dúas grandes estreas: a nova serie da TVG, ‘Punto Nemo’, que chega o martes (1 de abril), e a serie documental ‘Galicia diversa’, dispoñible desde o mércores (2).

Este novo thriller de ciencia ficción, ‘Punto Nemo’, que se emite os luns no prime time da TVG, narra a historia dunha expedición oceanográfica que viaxa ata a gran illa de plástico do Pacífico para sensibilizar sobre este problema ambiental. Un erro de navegación leva a tripulación ata o misterioso Punto Nemo, unha illa cunha antiga base militar rusa, que porá a proba as súas habilidades para sobrevivir. Dirixida por Denis Rovira, á cabeza do elenco desta produción destacan Óscar Jaenada, Alba Flores e Maxi Iglesias. ‘Punto Nemo’ está coproducida por Ficción Producciones e Ukbar Filmes coa colaboración da Xunta de Galicia, a canle portuguesa RTP, a Deputación de Pontevedra e a Televisión de Galicia. O primeiro episodio estará dispoñible en AGalega.gal durante dúas semanas.

Pola súa parte, ‘Galicia diversa’, proxecto seleccionado na última convocatoria de contidos dixitais da CRTVG, é unha serie documental que ofrece unha visión ampla e sen prexuízos sobre a realidade das persoas con discapacidade e diversidade funcional en Galicia. A través de testemuños de galegas e galegos, así como dos seus familiares, profesionais e voluntarios, aborda cuestións como a educación, o emprego, a atención terapéutica e o acceso á cultura e ao deporte. O mesmo mércores, ‘Galicia diversa’ presentarase ás 11:00 horas no centro sociocultural O Ensanche de Santiago, onde participarán os directores Damián Varela e Manuel Darriba; o director de Proxección Social da CRTVG, Xaime Arias; a representante da plataforma AGalega.gal María Sabucedo e figuras destacadas do ámbito da diversidade funcional, como os atletas paralímpicos Jesús Cabo e Ramona Seijo; o presidente de Fademga Plena Inclusión, Eladio Rodríguez, e a presidenta da Federación de Asociacións de Persoas Xordas de Galicia, María Alonso.

Ademais destas dúas estreas, a plataforma tamén ofrece este luns (31 de marzo) a retransmisión en directo do partido de Primeira División entre o Celta de Vigo e a U. D. As Palmas, un duelo clave para os vigueses, que veñen de gañar ao Valladolid por 0-1.

A oferta semanal de AGalega.gal complétase co mellor cine internacional. O xoves (3 de abril) estrearase ‘Amor á siciliana’, unha historia de amor e mafia ambientada na Segunda Guerra Mundial, dispoñible durante 30 días. O venres (4) será a quenda de ‘Enfrontados’, un wéstern sobre vinganza e supervivencia tras a Guerra Civil estadounidense, que poderá verse durante 7 días. Finalmente, o sábado (5) chegará ‘A rapaza do tren’, un thriller baseado no bestseller homónimo, dispoñible durante 15 días, que afonda na obsesión e os segredos ocultos dunha muller atrapada entre a realidade e a fantasía.
 

Santiago, 28.03.2025.-  Televisión de Galicia comeza a emitir desde este venres en Ultra Alta Definición (UHD) na TDT en toda Galicia, converténdose no primeiro radiodifusor autonómico que emite unha canle destas características en España. Así o anunciou o director xeral da Corporación, Alfonso Sánchez Izquierdo, na comisión de control á CRTVG celebrada esta mañá no Parlamento de Galicia.

Despois dun período de probas a canle TVG UHD emítese simultaneamente coas xa existentes emisións en Alta Definición (HD) da TDT. A UHD proporciona unha maior calidade visual grazas á aplicación de tecnoloxías avanzadas, como unha resolución de imaxe incrementada 4K ou a implementación da tecnoloxía de alto rango dinámico (HDR) na imaxe, o que mellora o contraste, con cores máis vivas e un maior grao de detalle visual tanto nas tonalidades escuras coma nas máis brillantes. Ademais, a UHD implica unha compresión do sinal de vídeo tipo HEVC de alta eficiencia, cun mellor aproveitamento do espectro radioeléctrico e unha gama de cores ampliada con respecto á HD.

Para beneficiarse da canle TVG UHD en todo o seu conxunto de prestacións, o televisor ou o descodificador de TDT deben ser compatibles con sinais 4K-HDR. Só é preciso resintonizar o dispositivo para recepcionar a nova canle, e non se precisa ningunha modificación nas antenas receptoras nin nos equipos de distribución TDT dos edificios.

Con este novo fito, os medios públicos galegos reforzan o seu perfil na vangarda tecnolóxica e reiteran o seu compromiso coa evolución tecnolóxica e a innovación, ofrecendo á cidadanía galega un servizo de maior calidade.

Na mesma comisión, o director xeral rexeitou unha vez máis as acusacións vertidas sobre a suposta exclusión da lingua galega dos requisitos para traballar na CRTVG e que cualificou esa información como “un dos maiores bulos e, posiblemente tamén dos máis absurdos, que se crearon nos últimos tempos ao redor da Corporación. Basta con ler as bases do Concurso para saber que iso é falso”, apuntou Sánchez Izquierdo.

O director xeral volveu explicar que “a realidade é que todo posto de traballo ofertado na convocatoria do Concurso Oposición da CRTVG ao que fan referencia require, de forma expresa e imprescindible, a acreditación do coñecemento regrado da lingua galega” e fai un chamamento a que desde postos de responsabilidade non se fomenten esta clase de noticias falsas.