CSAG Viva

Santiago, 7.11.2025.-   A primeira canle da Televisión de Galicia emite este domingo, a partir das once menos dez da noite, unha nova entrega do ‘En xogo’. Sevi Martínez reúne nesta xornada a Roberto Lago, Dani Mallo, Javier Guillén, Alejandro Reza e Xabier Rodríguez Campos para debater sobre os resultados dos nosos equipos no fútbol profesional.

Xusto no comezo do programa, o primeiro punto de directo será o estadio municipal de Balaídos, onde se disputa o Celta-F. C. Barcelona da Primeira División. Xunto ao resumo do sucedido sobre o céspede chegarán as declaracións na sala de prensa do adestrador Claudio Giráldez e Tomás Alonso recollera a saída dos seareiros para que opinen da actuación dos futbolistas celestes.

Outro dos partidos atractivos da fin de semana é o Deportivo da Coruña-Cultural Leonesa. Unha vitoria herculina e a combinación doutros marcadores pode levar de novo ao equipo de Antonio Hidalgo á zona privilexiada da clasificación, co ascenso directo como obxectivo. O mes de novembro vai estar protagonizado polo Deportivo nas emisións deportivas da Televisión de Galicia. A primeira canle ten programada para o domingo 16 ás 18:30 a visita ao estadio Arcángel para medirse ao Córdoba e o sábado 29, tamén ás 18:30, ofrecerá o enfrontamento do cadro coruñés no Carlos Belmonte ante o Albacete.

Retransmisións na G2 

A segunda canle da Televisión de Galicia reserva a grella da tarde deste sábado para o fútbol galego. A partir das catro e cuarto, desde Espiñedo, emitirá o derbi galego da Primeira RFEF entre o Arenteiro do Carballiño e o Rácing de Ferrol. Mentres os locais necesitan puntos para escapar da zona de descenso, os departamentais están obrigados a recuperar o crédito perdido nas dúas últimas semanas ante o Celta Fortuna e o Tenerife, dous rivais directos polo ascenso á Segunda División.

A partir das seis e media da tarde, as cámaras da G2 e da plataforma AGalega.gal estarán no estadio do Couto, onde o Ourense C. F. disputa a final da Copa Federación ante o Orihuela. Os das Burgas atravesan polo mellor momento da temporada, tras eliminar ao Oviedo na Copa do Rei e derrotar ao Arenas de Getxo na Liga da Primeira RFEF.

A Segunda RFEF en AGalega.gal

Os afeccionados ao fútbol da Segunda Federación teñen cada fin de semana unha ventá aberta na plataforma AGalega.gal. O domingo, ás doce do mediodía, o protagonismo será desde o campo Arsenio Iglesias de Abegondo para o derbi de veciños entre o Fabril Deportivo e o Bergantiños de Carballo. Pola tarde, ás cinco, o campo do Vao acollerá o Coruxo-Lealtad de Villaviciosa.

Santiago, 07.11.2025.-  O programa ‘Zigzag’, da Televisión de Galicia, é finalista nos premios da XVII Bienal Española de Arquitectura e Urbanismo (BEAU), organizados polo Ministerio de Vivenda e Axenda Urbana. A decisión coñecerase o 11 de decembro, durante a inauguración da Bienal en Ponferrada (León).

A BEAU distingue o labor de ‘Zigzag’ na divulgación da arquitectura. O programa foi seleccionado pola sección creada coa arquitecta e investigadora da UDC Ruth Varela, emitida de forma quincenal entre 2023 e 2024. Nela, Varela explicou con linguaxe accesible a arquitectura contemporánea galega e as intervencións recentes na paisaxe.

‘Zigzag’ é un referente da información cultural en Galicia. Presentado por  Pilar G. Rego e pola coordinadora de Cultura da CSAG, María Solar, leva máis de 15 anos en emisión continua, o que o converte no programa cultural diario máis veterano das televisións públicas autonómicas.

O espazo recibiu cinco premios Mestre Mateo e forma parte da estratexia #Cultura365 da Corporación de Servizos Audiovisuais de Galicia (CSAG), e conta tamén co seu propio espazo na plataforma AGalega.gal. O seu obxectivo é achegar ao público a actualidade da cultura galega en todas as súas formas de expresión.
 

Santiago, 07.11.2025.-    Continúa a semana de retransmisións deportivas na Radio Galega e na plataforma AGalegaAudio.gal. Despois da cuarta xornada da Europa League, as competicións de liga volven ser as protagonistas. Este venres, a partir das 20:30 h, Roberto Carlos Carballo porase ao mando do ‘Galicia en Goles’ para contar a xornada polideportiva nas disciplinas de balonmán, baloncesto e fútbol sala. Así, o programa daralles cobertura aos partidos Alacant-Cangas, Gran Canaria-Ensino, La Seu-Baxi Ferrol e Santa Coloma-O Parrulo Ferrol.

O sábado, desde as 14:15 h, o estadio municipal de Riazor será o punto principal de directo coa retransmisión do partido da Segunda División profesional entre o Deportivo da Coruña e a Cultural Leonesa. Tras a vitoria en Zaragoza, o equipo de Antonio Hidalgo volveu situarse en postos de promoción e mesmo un resultado positivo esta fin de semana colocaríao preto do ascenso directo á Primeira División. Antes, a Primeira Federación estará presente co derbi galego desde o Espiñedo, entre o Arenteiro e o Rácing de Ferrol. Mentres, o Celta Fortuna recibe en Barreiro o Talavera e o Pontevedra visita Salamanca para medirse ao Unionistas. 

A final da Copa RFEF desde O Couto, entre o Ourense Club de Fútbol e o Orihuela, completará a tarde futbolística. No polideportivo destaca o baloncesto da Federación, co Obradoiro-Tizona de Burgos no Sar e o Ourense-Cartaxena no Paco Paz.

Xa o domingo, a edición matinal principiará ás 12:00 h co Barcelona-Deportivo da Primeira División feminina desde o estadio Johan Cruyff. Outra das citas destacadas será o derbi da Segunda Federación entre o Fabril Deportivo e o Bergantiños de Carballo no campo Arsenio Iglesias de Abegondo. Tamén haberá oco para o hóckey sobre patíns, xa que o Liceo recibe en Riazor o Reus tres días despois de comezar con vitoria a súa andaina na Liga Europea.

Ás 14:15 h seguirá a sesión de tarde ata a medianoite, con toda a atención posta no estadio municipal de Balaídos, xa que o Celta regresa da súa experiencia europea en Zagreb recibindo o F. C. Barcelona. O contundente 0-3 obtido no estadio do Dinamo confirma o excelente momento dos olívicos, que comezan a escalar postos na Liga e están xa cuartos na clasificación xeral do torneo continental.

Durante a tarde haberá seguimento do Guadalaxara-Lugo, da Primeira RFEF, e do Coruxo-Lealtad, da Segunda RFEF. No polideportivo destaca o Estudiantes-Básquet Coruña da Primeira Federación, cun man a man entre dous candidatos ao ascenso directo á Liga ACB.

Baloncesto en AGalegaAudio.gal

O sábado, a partir das 19:00 h, Pedro Pablo Alonso e Roberto Anidos levarán os afeccionados ao baloncesto toda a paixón da Liga ACB desde o Pazo dos Deportes de Lugo. O Breogán recibe o Gran Canaria, un rival co que está igualado na clasificación xeral, con dúas vitorias e tres derrotas tras o primeiro mes de competición. A emisión deste encontro chegará de xeito íntegro a través da plataforma AGalegaAudio.gal.

Santiago, 7.11.2025.-  Televisión de Galicia estrea este luns o programa ‘Pulso activo’, unha nova proposta para todas as mañás que vai convidar a audiencia a comezar o día con enerxía. Este novo formato diario, concibido como unha clase de fitness inclusiva, adaptada e segura, contará con Eddy Insua como adestrador persoal e catro participantes con necesidades e condicións de saúde diferentes.

Eddy Insua, adestrador e comunicador, conducirá de luns a venres este novo espazo cun estilo próximo, motivador e enérxico. Estará acompañado por Estrella, Silvia, Noemi e Anxo, que representan á diversidade da audiencia e demostran que o exercicio é posible para todos.

Durante 20 minutos diarios, ‘Pulso activo’ ofrece unha sesión completa de adestramento adaptado, combinando exercicio, motivación e momentos de emoción compartida. O obxectivo é combater o sedentarismo, mellorar a mobilidade, e promover o benestar físico e emocional. Con este espazo, producido por La Región Televisión, Televisión de Galicia propón unha cita coa saúde, coa enerxía e co movemento.  

Santiago, 07.11.2025.-    Esta semana púidose ver unha superlúa, o momento en que a lúa chea está no seu punto máis achegado á Terra e por iso se percibe máis grande e brillante. Por este motivo, ‘Luar’ (21:50 h) vai falar hoxe de lunáticos e lunáticas e trasladará os seus espectadores á Lúa. En liña con este contido máxico, o programa recibirá a visita do Bruxo Queiman, un actor con máis de 20 anos de experiencia como transmisor dunha cultura milenaria, a atlántica. No seu espectáculo visual son protagonistas o lume da queimada, as bruxas, os trasnos e os seres doutros tempos.

No capítulo musical, o espazo da TVG recibirá este venres a visita de David Civera, un dos cantantes máis soados na década dos 2000. Tras representar a España no Festival de Eurovisión, onde conseguiu a sexta posición co seu tema ‘Dile que la quiero’, o turolense converteuse nunha das voces máis recoñecidas do pop latino nacional e no autor de moitos dos grandes éxitos de comezos de século. Hoxe interpretará os seus temas máis recentes e unha selección dos seus grandes hits.

Tamén pasarán polo escenario a orquestra La Ocaband, a Asociación Cultural Retranqueiros de Ames e o coro tradicional galego Cantares do Brión, que interpreta música de autoría propia e tamén de poetas galegos. Ademais, ‘Luar’ contará coa presenza do ‘arranxatodo’ Lalo Penelas, interpretado por Xosé A. Touriñán, que continúa viaxando por Galicia adiante para facer as súas ‘chapuzas’.

Finalmente, no tempo do concurso de talentos ‘Recantos’, esta semana será a quenda de Caiño, representante da comarca Terras de Pontevedra, e de Nusky, procedente do Miño Oriental.

Santiago, 05.11.2025.-    O mes de novembro chega a Xabarín.gal con novas propostas que combinan entretemento, aprendizaxe e promoción da lingua galega, reforzando o compromiso da CSAG coa infancia e co seu papel como servizo público de comunicación. A plataforma amplía a súa oferta con contidos que conectan coa Xeración Xabarín e fomentan o uso do galego desde as primeiras idades, ao tempo que incorpora producións internacionais de prestixio educativo.

Así, este venres estrearanse os 20 primeiros capítulos de ‘Sonic Boom’, a nova versión animada do icónico personaxe dos videoxogos. Sonic e os seus amigos -Tails, Knuckles, Amy e Sticks- protagonizan aventuras cheas de acción, humor e amizade mentres loitan contra o malvado doutor Eggman. A serie, de gran recoñecemento internacional, consolida a aposta de Xabarín.gal por ofrecer animación de calidade en galego e contidos familiares capaces de conectar co público infantil e tamén cos espectadores nostálxicos da primeira etapa do ‘Xabarín’.

O venres seguinte, 14 de novembro, será a quenda de ‘Galego para peques’, unha colección de 14 cancións audiovisuais pensadas para favorecer o uso do galego na infancia. O proxecto, recoñecido co XVI Premio Rosalía de Castro de Lingua da Deputación da Coruña e finalista nos premios Youtubeiras+ e no Festival Carballo Interplay, busca ofrecer recursos atractivos para escolas e familias. A serie destaca polo seu deseño amable e inclusivo, cun coidado especial na iluminación, o ritmo e o son, e incorpora pictogramas como ferramenta de comunicación aumentativa, garantindo o acceso a nenos e nenas con necesidades educativas especiais. 

Ese mesmo día tamén se incorporarán dez novos capítulos de ‘Shin Chan’, unha das series máis queridas polo público galego. As aventuras de Shinnosuke Nohara seguen a ofrecer humor irreverente e retratos familiares cheos de espontaneidade, mantendo o espírito da Xeración Xabarín e reforzando a conexión interxeracional que caracteriza a plataforma.

Unha semana despois, o 21 de novembro, estrearase a serie ‘Learning Time with Timmy’, producida por BBC Studios en colaboración co British Council. Protagonizada por Timmy, o cordeiro de ‘Shaun the Sheep’, esta serie educativa achega unha introdución ao inglés a través de xogos, repeticións e narracións visuais. Pensada para nenos e nenas de 3 a 6 anos, reforza a aprendizaxe de idiomas desde un espazo seguro, divertido e en galego, en coherencia coas liñas educativas e culturais da CSAG.

Finalmente, o venres 28 de novembro será a estrea de ‘Mononautas’, unha serie canadense sobre dous intrépidos monos astronautas que viven misións espaciais cheas de caos, humor absurdo e acción desbordante. Con ritmo trepidante e estética colorista, é unha proposta perfecta para o público de 6 a 10 anos e recupera un dos títulos máis recoñecibles e divertidos da programación infantil recente.

Con esta nova oferta, Xabarín.gal consolídase como un espazo de referencia para o público infantil e familiar galego, apostando por contidos de calidade que entreteñen, educan e contribúen á difusión da lingua e da cultura galegas.

Santiago, 3.11.2025.-  AGalega.gal reforza esta semana a súa oferta de contidos con novas propostas que poñen en valor a creación galega e títulos de longametraxes destacadas, sen esquecer as estreas da grella da TVG. Entre as incorporacións máis relevantes están os espazos ‘Clac’ e ‘Terra de cómics’, dúas producións que consolidan a aposta da plataforma pola cultura, a divulgación e a ficción de calidade.

O luns 3 de novembro, a plataforma estrea un novo capítulo da serie documental ‘Terra de cómics’, que nesta ocasión viaxa ata O Grove para coñecer o traballo da artista Lucía Cid. No seu estudio, a creadora comparte o proceso creativo e as influencias que marcan a súa traxectoria dentro da banda deseñada galega, ligada ao xénero fantástico e de aventuras.

A media semana, o mércores 5, chega a AGalega.gal o programa ‘Clac’, un espazo de análise e debate arredor das obras fundamentais do cinema galego. Nesta primeira selección, o público poderá gozar de conversas sobre filmes de referencia como ‘O que arde’, ‘Os fenómenos’, ‘María Solinha’, ‘Eroski Paraíso’, ‘O apóstolo’, ‘A illa das mentiras’, ‘Cela 211’, ‘A esmorga’ e ‘O descoñecido’. A colección ampliarase con novas entregas nas próximas semanas.

Incorpóranse ao catálogo tres longametraxes

O cinema internacional tamén terá un peso destacado na programación da semana. O xoves 6, chega á plataforma ‘Adeus, señor Haffmann’, unha película que combina intriga e dilemas morais durante a ocupación alemá en París, protagonizada por Daniel Auteuil. O filme estará dispoñible durante 30 días. Ese mesmo día, engádese tamén un novo capítulo de ‘Bótalle azucre’.

O público poderá gozar o venres 7 de ‘O home do norte’, un épico relato de acción, vinganza e destino inspirado nas lendas nórdicas, dispoñible durante 7 días. E o sábado 8, completarase a semana coa estrea de ‘Un cabaré no campo’, unha comedia rural chea de humor, emoción e espírito comunitario, en que un mozo labrego decide salvar a granxa familiar montando un cabaré no medio do campo (dispoñible 30 días).

Xunto con estas novidades, AGalega.gal continuará ofrecendo todas as estreas da grella da TVG, entre elas o novo formato ‘Código 092: en primeira liña’ —dispoñible desde o luns 3— e o especial ‘Chegou o gran día dos mortos’, que poderá verse o sábado 8.

Santiago, 31.10.2025.-   ‘Saúde e Rock and Roll’ eran as palabras que se escoitaban na despedida do mítico programa de música da Radio Galega ‘Estudio 3’, que estivo en antena 25 anos na emisora pública galega. E desde esta semana é tamén o nome do novo podcast que nos convida a viaxar pola historia que se agocha detrás dos grandes clásicos do rock e do pop.

Presentado por Ricardo Alonso, ‘Saúde e Rock and Roll’ recupera aquel espírito e lánzase este venres en formato podcast para adaptarse aos hábitos de todos os oíntes, incuídos os que só escoitan música a través do móbil. Cada semana, a plataforma dixital AGalegaAudio.gal, estreará unha nova entrega, os venres. En cada capítulo ofrecerase unha selección musical de clásicos da música rock e pop e debullaranse as anécdotas e curiosidades desas cancións que seguen marcando xeracións.

AGalegaAudio.gal é a plataforma de referencia da radio en galego en que se atopa toda a programación da Radio Galega, así como un amplo abano de podcasts, videopodcasts e contidos nativos exclusivos de humor, cine, historia, ficción, cultura, deporte, música, etc. A plataforma é gratuíta e está a disposición da audiencia desde calquera parte do planeta. Pódese descargar desde Google Play, Apple Store, Chromecast e nas principais televisións intelixentes (dispoñible para descargar en versión iOS e Android).
 

Santiago, 30.10.2025.-    As plataformas AGalega.gal e Xabarin.gal presentan desde mañá, 31 de outubro, novas seccións especiais dedicadas á celebración do Samaín, con contidos temáticos para todos os públicos.

En AGalega.gal, o público poderá gozar dunha completa selección audiovisual pensada para a noite máis terrorífica do ano. A proposta inclúe películas como ‘O Apóstolo’ e ‘O corpo aberto’; programas especiais como ‘Soño contigo: Lugares de medo’ e ‘Historias a pé de páxina: A Santa Compaña e os zombies’, e documentais como ‘George Romero: Zombies e Santa Compaña’ e ‘Buscando a Santa Compaña’. Tamén se incorporará un especial de ‘Era Visto!’ titulado ‘Contos de medo’.

Pola súa parte, Xabarin.gal ofrecerá unha sección especial de Samaín para o público infantil, con capítulos temáticos de series moi queridas polo público galego como ‘Os Bolechas’, ‘Doraemon’, ‘Ladybug’, ‘Paddington’, ‘Monster Allergy’, ‘Pipo’, ‘Diario de Alice’, ‘Caracois’, ‘Bibopalula’, ‘O home máis pequerrechiño do mundo’, ‘Glumpers’ e ‘Os contos do camiño’.

Así pois, as canles dixitais dos medios públicos galegos ofrecen dúas propostas complementarias que celebran o Samaín en galego, combinando medo, humor e tradición para gozar en familia.

Santiago, 30.10.2025.-   Responsables dos arquivos e centros de documentación das distintas canles autonómicas reunidas en FORTA participan este xoves na xornada de traballo ‘Televisión e memoria dixital: arquivos audiovisuais na era da intelixencia artificial’, en Santiago.

A CSAG acolle a celebración da comisión de documentación da FORTA nun encontro en que se analiza o impacto da intelixencia artificial nos procesos de xestión e preservación audiovisual. Na reunión están representados os medios públicos autonómicos de Cataluña, Castela-A Mancha, Illas Baleares, Madrid, Principado de Asturias, Comunidade Valenciana, Murcia e Galicia.

Ademais, a xornada inclúe unha visita ao arquivo da CSAG, en plena fase de dixitalización, e ás redaccións da TVG e da Radio Galega. Entre os temas de traballo, estanse a poñer en común as ferramentas de intelixencia artificial que os distintos medios testan e analizan para o tratamento e conservación dos materiais audiovisuais.

A IA está chamada a revolucionar a documentación en todos os seus ámbitos, desde a análise de contido ata a propia restauración dos documentos e nese proceso o persoal documentalista desenvolverá un papel clave, como garante da calidade dos datos e contidos. A súa participación nos procesos de adestramento, selección e validación dos sistemas permitirá mellorar a eficiencia e a calidade do conxunto dos arquivos audiovisuais das televisións públicas. 

Santiago, 28.10.2025.-  A Corporación de Servizos Audiovisuais de Galicia (CSAG) pon en marcha unha nova edición do certame ‘A canción do Nadal’, que busca, entre as propostas recibidas de toda Galicia, a mellor banda sonora para acompañar os espectadores durante as festas de Nadal de 2025.

As persoas interesadas en participar poderán presentar as súas cancións orixinais e inéditas, escritas en lingua galega e cunha duración máxima de tres minutos, ata o 9 de decembro de 2025 ás 23:59 horas. Os temas, de temática libre e espírito de Nadal, enviaranse en formato .mp3 (e opcionalmente cun vídeo musical en .mp4) ao enderezo canciondonadal2025@csag.gal.

O premio para a canción gañadora será de 1.500 euros brutos, e a peza seleccionada converterase na banda sonora oficial do Nadal 2025 nos servizos audiovisuais e dixitais da Corporación. Ademais, o tema premiado terá difusión na televisión e radio públicas galegas, así como nas redes sociais da CSAG.

As cancións serán valoradas por un xurado, composto por cinco membros designados pola dirección da Corporación, segundo criterios de orixinalidade, calidade técnica e valor audiovisual. O 10 de decembro farase público o tema gañador e unha lista puntuada ata o quinto posto na web www.csag.gal, onde tamén se poden consultar as bases completas do concurso. 

Esta é a décimo primeira edición deste certame musical, que o ano pasado gañou Christian Pensado co tema ‘Luz xigante’.

Santiago, 27.10.2025.-    A Corporación de Servizos Audiovisuais de Galicia ofrece esta semana unha ampla programación deportiva centrada na Copa do Rei de fútbol, que se disputará entre o martes e o xoves, con tres partidos retransmitidos por TVG e a G2.

O martes, a Unión Popular de Langreo e o Rácing de Ferrol xogan na G2 a partir das 19:30 h. O mércores, tamén pola G2, o estadio do Couto acollerá o derbi galego entre a Unión Deportiva Ourense e o Pontevedra, con retransmisión a partir das 20:30 horas. E xa o xoves, ás 21:00 horas, e pola primeira canle da TVG, un dos pratos fortes da eliminatoria galega: o partido Sámano-Deportivo da Coruña.

A Radio Galega e AGalegaAudio.gal tamén realizarán un seguemento especial das tres xornadas de Copa. A plataforma dixital AGalegaAudio.gal emitirá catro partidos: Langreo-Rácing de Ferrol, Ourense C. F.-Real Oviedo e Negreira-Real Sociedade, o martes a partir das 18:45 h; e o mércores, o derbi galego U. D. Ourense-Pontevedra.

E a emisora pública, a Radio Galega, levará o xoves á FM unha edición especial do espazo de deportes ‘Galicia en Goles’ desde as 18.45 horas, cos partidos Puerto de Vega-Celta de Vigo e o posterior Sámano-Deportivo.

Baxi Ferrol na Eurocup, o mércores por AGalega.gal

Ademais do fútbol, o baloncesto galego tamén terá protagonismo esta semana, coa disputa da cuarta xornada da Eurocup feminina o mércores. A partir das 20:15 horas, a plataforma AGalega.gal ofrecerá en directo desde A Malata o encontro entre o Baxi Ferrol e o Benfica de Portugal.

Con esta programación, a CRTVG reforza a súa aposta polo deporte galego e polos clubs do país en competicións estatais e europeas, achegando os seus encontros a todos os públicos a través da televisión, a radio e as súas plataformas dixitais.

Santiago, 24.10.2025.-    Televisión de Galicia acaba de pechar un acordo para emitir, como mínimo, os derbis galegos de Primeira FEB —antiga LEB Ouro— entre o Leyma Coruña, o Monbus Obradoiro e o Club Ourense Baloncesto. Con esta decisión, a canle pública reafirma o seu compromiso co baloncesto galego e coa difusión do deporte de base e profesional.

Os primeiros derbis serán o 17 de decembro, o Leyma Coruña - Club Ourense Baloncesto e o 28 de decembro o Monbus Obradoiro - Leyma Coruña, en Santiago. Estas emisións de baloncesto súmanse ás xa anunciadas de todos os partidos do Baxi Ferrol na Eurocup de baloncesto feminino, que emiten a G2 e a plataforma AGalega.gal.

A directora xeral da Corporación de Servizos Audiovisuais de Galicia saíu ao paso na xornada de onte das falsidades e desinformacións que correron e corren ao redor da adquisición dos dereitos da Liga ENDESA por parte da TVG e doutros operadores. «Non é certo que a TVG non se interesase polos dereitos de retransmisión do Río Breogán. Iso é falso. E seguimos interesados. Se é que se venden», comezou a súa alocución Mª Concepción Pombo.

Ante as afirmacións do BNG en senso contrario, Pombo engadiu que «TVE non emitiu nin un só partido, deses que vostedes anunciaron». En canto ao panorama das televisións públicas, explicou que «a única canle que consta que adquiriu dereitos de emisión dun partido por xornada por 800.000 euros anuais foi a televisión catalá. Ollo, que non comprou dereitos para seguir determinados equipos (...), comprou un partido por xornada”.

Sobre a posición da Televisión de Galicia, a directora xeral afirmou: «Mantivemos e mantemos ata día de hoxe contacto directo ao máximo nivel coa ACB para explorar opcións de acceso a partidos do Breogán. Iso é o que nos interesa e polo que poderiamos chegar a un acordo económico: polo Breogán, non por calquera partido que nos toque na xornada». 

A directora xeral da CSAG subliñou tamén o compromiso histórico da Corporación co Breogán: «Hai dúas temporadas, a TVG retransmitiu a participación do Río Breogán en competicións europeas, e a Radio Galega foi o único medio, o único, que acompañou o equipo na fase previa». 

A responsable da CSAG incidiu en que «impulsar presións públicas, baseadas en especulacións e loiadas, para que se adquira a toda costa un determinado dereito de emisión é unha táctica que só favorece a posición do vendedor e debilita a do comprador, neste caso un ente público, en detrimento do interese xeral», recalcou. E concluíu: «Sempre que existan dereitos dispoñibles e condicións orzamentarias asumibles, a TVG amosará interese en ofrecer estes contidos en aberto, e de balde, para todos os galegos».
 

Santiago, 21.10.2025.- A semana chega cargada de novidades a AGalega.gal, coas estreas da esperada serie galega ‘O home perfecto’ e a comedia dixital ‘Bonito con bonito’, dous lanzamentos que combinan talento, humor e emoción. Ademais, a plataforma ofrecerá novas entregas de programas dixitais e máis oferta de cinema e documental para todo o público.

A plataforma dixital da CSAG incorpora o martes os dous primeiros episodios de ‘O home perfecto’, despois da súa estrea na TVG. A produción segue as historias cruzadas de Rebeca, que intenta recompoñerse tras unha relación marcada pola violencia, e Luísa, unha muller maior e illada que afronta a soidade. A aparición dun misterioso ‘home perfecto’ transformará as súas vidas e obrigaraas a repensar o amor, a liberdade e a autoestima.

A comedia ‘Bonito con bonito’, con David Perdomo

O mércores, ás 21:00 horas, estréase en AGalega.gal a nova comedia ‘Bonito con bonito’, protagonizada por David Perdomo, quen se ve forzado a presentar un programa de costura debido a un antigo contrato coa televisión. Acompáñao Carlota Merabillas, a peculiar directora dunha escola de costura coa que vivirá situacións absurdas e cheas de humor. Ese mesmo día, ás 20:00 horas, celebrarase unha preestrea en Bertamiráns coa presenza dos protagonistas e de varios rostros coñecidos da TVG.

Desde o luns 20 pode gozarse dun novo episodio de ‘Terra de cómics’, que se mergulla no universo creativo da artista Bea Lema, que abre as portas do seu estudio na Coruña para amosar o seu proceso artístico, en que o bordado se converte nunha ferramenta expresiva dentro da banda deseñada. O capítulo percorre as súas influencias e a súa traxectoria no panorama do cómic galego actual.

‘Bótalle azucre’ trae á plataforma novas aprendizaxes o xoves. A influencer cubana Anita Mateu continúa coa súa divertida aventura para conseguir un título oficial de galego, nun programa fresco, entretido e cunha acollida excelente entre o público novo.

Cinema na fin de semana e novas entregas de ‘Galicia vertical’

E a fin de semana arrinca o venres con ‘Encerrada’, un intenso thriller dispoñible durante 30 días. ‘Encerrada’ conta a historia de Jessica, unha muller que intenta reconstruír a súa vida xunto aos seus fillos, ata que o pai dos nenos reaparece de forma violenta e reabre feridas do pasado.

O sábado AGalega.gal emite o filme de ciencia ficción británico ‘Brazil’, o clásico de culto de Terry Gilliam, dispoñible durante 7 días. A sátira visual sobre un mundo burocrático e controlado pola tecnoloxía continúa a ser unha das obras máis impactantes do cine contemporáneo.

A serie documental ‘Galicia vertical’, exclusiva de AGalega.gal, incorpora dous novos episodios tamén o sábado. Desde as Fragas do Eume, o escalador Adrián Álvarez afronta unha ascensión de extrema dureza na canteira da presa do Eume, explorando a conexión entre a verticalidade e o bosque atlántico. E a seguinte parada da produción é no Canón do Sil (Os Peares), onde a familia Böck protagoniza unha viaxe interxeracional pola escalada clásica, que combina natureza, tradición e o patrimonio vitivinícola da Ribeira Sacra.

Santiago, 17.10.2025.-  ‘Serramoura’, unha das series más exitosas e emblemáticas da Televisión de Galicia, continúa a súa expansión internacional e chegará ás televisións dos países dos Balcáns grazas a un acordo de distribución internacional.

A produción, un thriller de suspense policial producido por Voz Audiovisual para a TVG, emitiuse na canle pública entre 2014 e 2020 con grande éxito. As súas once temporadas completas están dispoñibles en AGalega.gal, a plataforma dixital da Corporación de Servizos Audiovisuais de Galicia (CSAG). Ambientada nunha vila galega dedicada á madeira, a serie combina natureza, vida cotiá e tradición cun lado oculto de segredos e conflitos entre dúas familias polo control do negocio madeireiro.
 
A distribución na rexión balcánica será xestionada por DEXIN, despois dun acordo alcanzado por The Mediapro Studio Distribution, responsable das vendas internacionais da ficción. Anteriormente a serie galega fora vendida e emitida en canles de Rusia e nos Estados Unidos, neste último baixo o título ‘Black Forest’. 

Durante a súa emisión na TVG a serie foi líder de audiencia en numerosas ocasións e recibiu importantes recoñecementos: gañou durante catro anos consecutivos o Premio Mestre Mateo á Mellor Serie de Televisión e obtivo o Premio Apolo 2018 á Mellor Sintonía.

A CSAG segue a dar continuidade á súa estratexia de apoio ao sector audiovisual e desenvolve un intenso labor de internacionalización dos produtos galegos coas vendas a mercados estranxeiros das ficcións feitas en Galicia e por galegos. 
 

Santiago, 13.10.2025.-  A plataforma dixital AGalega.gal amplía esta semana o seu catálogo con dúas estreas exclusivas, centradas na creación galega e na natureza: ‘Terra de cómics’ e ‘Galicia vertical’. Ademais, chegan novos contidos de entretemento e cine, con propostas para todos os públicos que combinan cultura, humor e emoción.

Hoxe chega en exclusiva a AGalega.gal o programa ‘Terra de cómics’, unha serie cultural de oito episodios dedicada ao mundo da banda deseñada galega. O primeiro capítulo ten como protagonista a Miguel Porto, que abre as portas do seu estudo en Vigo para falar da súa traxectoria e do papel da saúde mental na súa obra. Cada luns publicarase un novo episodio que afonda na creatividade e no talento dos autores galegos.

‘Galicia vertical’, o reto da escalada

O sábado 18, AGalega.gal estrea en exclusiva ‘Galicia vertical’, unha serie documental que explora a práctica da escalada en distintos puntos de Galicia. Os dous primeiros episodios transcorren no Cabo Vilán e no Monte Galiñeiro, dúas paisaxes espectaculares que amosan a vertente máis aventurada e inspiradora do territorio galego.

A influencer Anita Mateu regresa o xoves 16, cun novo capítulo de ‘Bótalle azucre’, a serie en que continúa a súa divertida carreira para conseguir o título oficial de galego. Un formato fresco e entretido que mestura humor, aprendizaxe e identidade.

Cine da semana: do humor británico ao drama social francés

Tamén o xoves 16, a plataforma incorpora a comedia ‘Johnny English: Ataca outra vez’, co inconfundible Rowan Atkinson no papel do espía máis torpe do MI7. O filme estará dispoñible durante 14 días.

O venres 17 chega o aclamado drama ‘Os miserables’, un retrato das tensións sociais nos suburbios de París, dispoñible 30 días. E o sábado 18 engádese o thriller ‘Encerrada’, que narra a historia dunha muller decidida a recompoñer a súa vida tras anos de adicción e illamento, tamén dispoñible 30 días.
 

Santiago, 7.10.2025.-  A segunda canle da Televisión de Galicia e a plataforma AGalega.gal retransmitirán todos os partidos do Baxi Ferrol na Eurocup de baloncesto feminino.

O primeiro dispútase este xoves ás nove e media da noite hora galega. O equipo departamental comeza a fase grupos visitando en Lisboa o Benfica.

O segundo chegará o mércores 15 de outubro ás oito e cuarto da tarde na Malata, coa estrea do equipo galego ante a súa afección fronte ao Ostrava de Chequia. O terceiro encontro que pechará a primeira volta xogarase o día 22 de outubro en Polonia, coa visita do Baxi Ferrol ao Sosnowiec ás seis da tarde.

A segunda parte da liguiña terá o seguinte calendario:

Mércores 29 de outubro: Baxi Ferrol-Benfica, ás oito e cuarto.
Mércores 5 de novembro: Ostrava-Baxi Ferrol, ás sete e cuarto da tarde.
Mércores 26 de novembro: Baxi Ferrol-Sosnowiec, ás oito e cuarto da tarde.

Santiago, 03.10.2025.-  Televisión de Galicia preestreou este venres ‘O home perfecto’, a súa nova serie de ficción, no marco do Ourense Film Festival (OUFF). O evento celebrouse no Teatro Principal, cun photocall previo á proxección que reuniu o equipo da produción e numerosas caras coñecidas do audiovisual galego e da canle pública.

‘O home perfecto’, que chegará á pantalla da canle pública neste mes de outubro, é unha produción de Voz Audiovisual para TVG. Está dirixida por Giselle Llanio e Lucía Estévez e conta cun elenco encabezado por Adrián Castiñeiras, Alba Loureiro, Elena Seijo, Desiré Pillado, Xabier Fonseca, Tito Asorey, Carlos Villarino, Andrea Fernández, Marta Doviro e María Costas. 

A trama da serie segue a Rebeca, de 35 anos, e a Luísa, de 70, dúas mulleres que sen sabelo buscan unha segunda oportunidade tras vidas marcadas pola dor. Ambas caen baixo o engano dun home que se presenta como Gus para unha e Leo para a outra. Encantador e sensible, aparentemente o home perfecto, acaba por desaparecer cos seus aforros e ilusións, deixando tras de si un rastro de vítimas.

A canle pública galega, media partner desta 30ª edición do OUFF, presentou tamén neste festival a comedia ‘Pensión incompleta’, a primeira serie rodada nas catro linguas oficiais do Estado que impulsan EiTB, 3Cat e a CSAG.

Santiago, 03.10.2025.-    As series máis agardadas chegan ou amplíanse en outubro nas plataformas dixitais da CSAG: novos capítulos de ‘Shin Chan’, ‘As aventuras de Ladybug e Cat Noir’, ‘As Tartarugas Ninja’ e ‘Doraemon’ estarán dispoñibles en AGalega.gal e Xabarin.gal. A Corporación reforza a súa aposta polo audiovisual en galego, con novidades especialmente dirixidas á infancia e á xuventude que mesturan entretemento, educación en valores e prestixio internacional.

Así, a CSAG reforza a súa posición como referente no ámbito infantil e xuvenil, ofrecéndolles ás familias galegas contidos innovadores, inclusivos e de prestixio internacional, pensados para gozar en compañía neste outubro e, especialmente, na ponte festiva escolar de finais de mes. 

Este venres estréanse novos capítulos de ‘Shin Chan’, un fenómeno interxeracional que conecta coa histórica ‘xeración Xabarín’ e un recoñecemento de marca consolidado. O popular neno traveso e espontáneo volve protagonizar situacións absurdas e cómicas coa súa familia e amizades. O venres seguinte, 10 de outubro, chega a Xabarin.gal a galega ‘Galiworld’, unha serie de animación preescolar seleccionada na última convocatoria de contidos dixitais da CSAG. Na buliciosa cidade habitada só por galiñas e pitos, cada día é unha aventura que pon patas arriba a vida da metrópole. Sen diálogos e cun humor visual universal, ‘Galiworld’ ofrece innovación e creatividade galega para o público familiar.

O sábado 11, os espectadores gozarán na G2 e en Xabarin.gal os cinco capítulos iniciais de ‘Prodixiosa: As aventuras de Ladybug e Cat Noir’, que se irán ampliando ao longo do mes. Deste xeito, unha das series de máis éxito da animación internacional poderá verse agora tamén en galego. Este fenómeno global, con millóns de seguidores en todo o mundo, combina acción, maxia e emoción. Marinette e Adrien, dous adolescentes con vida dobre como superheroes, defenden París contra os viláns mentres xestionan os retos da súa identidade secreta. 

O 17 de outubro será o momento de ‘As Tartarugas Ninja’, coa nova versión da icónica serie. Leonardo, Raphael, Donatello e Michelangelo, catro irmáns mutantes expertos en artes marciais, loitan contra o crime nas rúas de Nova York. Acción trepidante, irmandade e humor convértena nun clásico revisitado que volve para conquistar novas xeracións. Estrearanse 26 episodios en Xabarin.gal.

A plataforma infantil e xuvenil tamén acollerá, a partir do venres 24, os 16 primeiros episodios de ‘Maddie e Triggs’. Maddie é unha nena con discapacidade visual que vive divertidas aventuras coa súa mascota Triggs nunha serie que presenta a diversidade funcional dun xeito normalizador, achegando valores de inclusión e amizade. Ademais, o día 30 chegan 26 capítulos da serie ‘Timmy Time’, producida polos prestixiosos estudios Aardman Animations e protagonizada por Timmy, un cordeiro pequeno e curioso que descobre as súas primeiras experiencias na escola infantil. 

Finalmente, o venres 31, estarán dispoñibles en Xabarin.gal e en AGalega.gal 10 novos capítulos de ‘Doraemon’, en que o gato robótico do futuro axuda a Nobita a resolver os seus problemas cotiáns mediante inventos fantásticos nunha das series máis queridas polo público familiar, perfecta para compartir entre xeracións.

Santiago, 02.10.2025.-  A Corporación de Servizos Audiovisuais de Galicia reforza a súa participación como media partner do Ourense Film Festival (OUFF) coa presentación este xoves da súa serie ‘Pensión incompleta’. O acto tivo lugar este mediodía no Café Ceres 1894, dentro da sección ‘Xanela’ do OUFF, coa asistencia de Montse Besada, xefa do Servizo de Contidos da CSAG; a directora da produtora Voz Audiovisual, Fernanda Tabarés; Óscar Doviso, director artístico do OUFF, e Sonia Torre, coordinadora de actividades paralelas.

‘Pensión incompleta’ é unha produción conxunta de TVG, ETB e 3Cat, que chegará ás pantallas en 2026 e que marca un fito ao ser a primeira serie gravada de maneira simultánea nas catro linguas oficiais do Estado: galego, éuscaro, catalán e castelán. A ficción mergúllase nas aventuras dun grupo de viaxeiros do Imserso que se ven involucrados na desaparición de obras de arte, converténdose nos principais sospeitosos.

Esta serie coral está concibida como unha road movie que amosará localizacións de Galicia, Euskadi e Cataluña, entre elas Muxía e Santiago de Compostela. No elenco figuran intérpretes como Ane Gabarain e Joseba Apaolaza, xunto a un destacado elenco de artistas galegos, encabezado por Luis Iglesia, Cristina Andrade, Manuel San Martín e María Costas. A proposta constitúe un modelo pioneiro de coprodución pública autonómica, cunha estrutura narrativa compartida. Dirixida por Jesús Font e Giselle Llanio, a serie aposta pola diversidade lingüística como motor narrativo, xa que cada personaxe expresa a súa identidade no seu idioma natal, reservando o castelán para as escenas corais.

A participación da canle pública no festival complétase o venres coa preestrea no Teatro Principal de Ourense da nova serie ‘O home perfecto’.