Raio Vallecano-Celta, partido destacado do 'Galicia en Goles' na tarde do sábado

Santiago, 29.10.2026.-    A Radio Galega e AGalegaAudio.gal dedican esta fin de semana un total de 26 horas ás retransmisións deportivas nas competicións con presenza galega. O venres, desde as 20:00 e ata as 00:00 h, Roberto Carlos Carballo conducirá a primeira edición, dedicada á análise en profundidade do calendario escoitando os protagonistas e avaliando a xornada cos especialistas.

O sábado, a partir das 14:15 h, a atención estará posta en Vallecas. O Celta visita o Raio tras o 0-0 ante o Betis en Balaídos e o rival acaba de perder 0-3 co Elx na xornada pasada. Ao remate chegará o partido do filial, o Fortuna, que recibe o Córdoba en Balaídos. O Rácing de Ferrol-Ponferradina completa a axenda futbolística do día.

Pola noite, o protagonismo será para o baloncesto. O Leyma Básquet Coruña recibe o Tenerife como décimo sétimo clasificado, cunha vitoria e catro derrotas. O adversario canario é segundo, con catro vitorias e unha derrota, tras mallar no Obradoiro o pasado domingo.

O domingo, ás 11:45 h, a xornada matinal pasará polo Sar, co derbi galego da ACB Obradoiro-Breogán. O clásico do baloncesto galego reúne dous equipos parellos, con tres vitorias e dúas derrotas. Durante a mañá tamén haberá cobertura do Barakaldo-Pontevedra, na Primeira RFEF. Os granates acaban de sufrir un revés ao quedaren fóra da Copa do Rei ante o Arousa.

A partir das 14:15 h, a sesión de tarde estará protagonizada polo fútbol das ligas da Federación. Na Primeira, o Lugo defende o liderado ante o Mérida no Anxo Carro, mentres a U. D. Ourense recibe a Cultural Leonesa tras cambiar de adestrador esta semana. Pola súa parte, o Fabril visita o Zamora coa obriga de puntuar para escapar da zona perigosa. No polideportivo destaca o balonmán, co Cangas-Alicante da Liga Asobal.

O luns, a Radio Galega e AGalegaAudio.gal programan unha edición especial de ‘Galicia en Goles’ a partir das 20:00 h para contar desde Riazor o partido que pecha a xornada de Primeira División entre o Deportivo e o Osasuna. O cadro herculino continúa na zona media con 11 puntos, pero acumula xa seis xornadas sen gañar, mentres o equipo de Pamplona escalou posicións da man de Joseba Arrasate malia perder o pasado luns no Sánchez Pijzuán ante o Sevilla.

#GaliciaEnXogo

O domingo, ás 23:00 h, a información do motor ocupará o primeiro treito do proxecto que leva o cancelo #GaliciaEnXogo.