'Cos Pés na Terra' visita hoxe un centro que incorpora as terapias no medio rural e na natureza - CSAG
'Cos Pés na Terra' visita hoxe un centro que incorpora as terapias no medio rural e na natureza
O programa (22:00 h) tamén ten unha cita cun ferreiro especialista na restauración de tesouros antigos e cunha gandeira de porco celta
Santiago, 19.04.2026.- No programa desta noite de ‘Cos Pés na Terra’ van saltar chispas, concretamente as de Jorge, un ferreiro especialista na creación de pezas únicas e na restauración de tesouros antigos.
O espazo da TVG tamén ten unha cita con Sara, Cris e Sele, tres mulleres á fronte dun centro que incorpora as terapias no medio rural: a psicoloxía, a logopedia e a terapia ocupacional, especialidades ás que elas suman o valor de estar na natureza.
Ademais, os espectadores coñecerán a María, unha gandeira de porco celta que se incorporou hai pouco a un mundo que non deixa de sorprendela. O equipo do programa estará con ela e cuns animais tan galegos coma a súa criadora.