O televisivo Carlos Lozano busca en 'A grande escolla' a manda perfecta de galiñas para a súa vida no rural

Santiago, 26.05.2026.-  O programa ‘A grande escolla’ recibe este martes, ás 22:45 horas na TVG, a Carlos Lozano nun episodio tan inesperado como revelador: a procura dunha nova manda de galiñas para a súa vida no campo, unha aventura moi afastada do brillo televisivo co que o público o identificou durante décadas.

Porque si, Carlos Lozano segue facendo televisión, pero hai tempo que a súa rutina mudou. Na serra de Madrid atopou unha forma de vida máis pausada, rodeado de animais, hortas e terra. A necesidade é real. Unha raposa arrasou boa parte da súa manda. Por iso chama a Noelia Rey convencido de que en Galicia pode atopar razas especiais. A chegada a Galicia está chea de eloxios á nosa terra e as súas rúas. A cita con Noelia ten lugar no restaurante As Rodas, en Sada. Alí, o madrileño deixa clara a súa prioridade: quere galiñas sas, libres e ben coidadas. 

O catálogo que lle presenta Noelia sorpréndeo desde o primeiro momento. Tres propostas moi distintas: a galiña de Mos, a piñeira e as poñedoras ecolóxicas. A primeira chega da Estrada da man de Rafael Carbajales. A galiña de Mos é unha raza histórica, robusta e perfectamente adaptada ao clima galego. O que máis impresiona ao presentador é descubrir que está diante da primeira raza de galiña autóctona recoñecida oficialmente en España. Cando Rafael revela que un galo adulto pode custar 50 euros, Carlos leva a man ao peito. O lote completo —trinta galiñas, dous galos e cen pitiños— acada os 1.800 euros. 

A seguinte proposta cambia completamente o rexistro. Carmen Fernández chega desde Betanzos coa galiña piñeira, unha raza galega aínda en proceso de recuperación. A criadora fala da raza con auténtica paixón. Explica que é máis lixeira, consome menos alimento e pode poñer tantos ovos como a de Mos. Ademais, introduce un detalle inesperado: os concursos de galiñas. Carlos escoita fascinado, aínda que o prezo volve golpealo con forza. Os 80 polos, 15 galiñas e 6 galos suman 2.100 euros.

A terceira opción chega desde Irixoa da man de Dolores Porto. Aquí o foco non está na raza autóctona senón na produtividade e no modelo ecolóxico. As súas galiñas viven en liberdade e aliméntanse exclusivamente con produtos ecolóxicos. Carlos conecta rápido coa proposta. Gústanlle a cor das aves e o sistema de crianza. Ademais, por primeira vez sente que os prezos entran dentro do que esperaba. O lote de 50 aves custa 1.400 euros. 

Xa só queda decidir que manda de galiñas viaxará con el ata Madrid.  'A grande escolla’ de Carlos Lozano, esta noite na TVG.