O programa 'Chegou o día' achega o desfile da Festa da Istoria de Ribadavia, un dos eventos máis destacados desta celebración - CSAG
O programa 'Chegou o día' achega o desfile da Festa da Istoria de Ribadavia, un dos eventos máis destacados desta celebración
O espazo amosará todo o percorrido e o ambiente festivo que se vive nesta localidade ourensá en cada edición
Santiago, 29.8.2025.- O Gran Desfile da Festa da Istoria, un dos acontecementos máis destacados deste evento que se celebra cada ano en Ribadavia, poderá ser seguido hoxe na TVG, nesta entrega do programa festeiro ‘Chegou o día’. Coa presentadora Laura Vaqueiro, achegarase todo o que aconteza desde o castelo desta localidade ourensá, situado no tramo final do desfile, contando con Pepe Capelán ao comezo da comitiva para non perder nin un momento da exhibición.
O Gran Desfile da Istoria de Ribadavia adoita contar coa participación de moita xente representando diferentes personaxes e escenas históricas que evocan a vida medieval na vila. O ‘Chegou o día’ dará a coñecer a orixe desta celebración, así como as mans encargadas de confeccionar a meirande parte das vestimentas.
Comentando cada detalle, ‘Chegou o día’ contará coa presenza de comentaristas expertos nesta celebración, como Joaquín Rodríguez, xerente de Hípica Celta, que leva 12 anos vivindo en Ribadavia; Antonio Míguez, viticultor experto en turismo, que falará do impacto que ten esta celebración na coñecida como a capital do Ribeiro; Concha Domínguez, organizadora do xantar medieval e encargada da decoración de toda a vila, e Emma Giráldez, que é desde hai 18 anos a responsable do enorme ‘armario’ da Festa da Istoria, o almacén onde gardan as vestimentas que poden alugar cada ano os milleiros de visitantes que acoden a Ribadavia.