O Castilla-Lugo abre este venres a Liga de Primeira RFEF na G2 e en AGalega.gal - CSAG
O Castilla-Lugo abre este venres a Liga de Primeira RFEF na G2 e en AGalega.gal
As traiñeiras centran as emisións da fin de semana, coas bandeiras de Bueu e Ares
Santiago, 29.08.2025.- O mes de agosto remata na Corporación de Servizos Audiovisuais de Galicia con moito deporte. O venres, ás 19:15 h, a segunda canle da Televisión de Galicia e a plataforma AGalega.gal teñen programada a retransmisión desde o estadio Alfredo Di Stefano de Valdebebas do partido que abre a temporada no grupo primeiro da Primeira RFEF, entre o Real Madrid Castilla e o Club Deportivo Lugo.
Este é o primeiro encontro dos 40 que emitirá a TVG durante a presente temporada, dando cobertura aos seis equipos galegos que participan na competición. Nas próximas semanas chegarán outras citas en que aparecerán o Pontevedra, o Rácing de Ferrol, o Ourense C. F., o Celta Fortuna e o Arenteiro.
O sábado, o protagonismo será desde as 18:00 h para a Liga ACT de traiñeiras, coa disputa en Bueu da bandeira do concello. Xa está rematando a temporada e semella que Cabo de Cruz perderá a categoría de honra, xa que está a 9 puntos de Kaiku. Mentres, Ares é antepenúltima con 65, a só dous puntos da novena clasificada, a embarcación de Ondarroa.
Xa o domingo, Ares será desta volta a sede da proba da Asociación de Clubs de Traiñeiras e A Coruña acollerá a Bandeira Teresa Herrera, poñendo o punto final ás festas de verán da cidade herculina. Participarán 15 embarcacións, 10 na proba masculina e cinco na categoría feminina.
'En Xogo'
Como cada domingo ao final da xornada, os espectadores da segunda canle da Televisión de Galicia poden gozar das mellores xogadas e toda a polémica arbitral no histórico programa ‘En Xogo’, que fai 40 anos. A atención vai ser para o partido da Primeira División entre o Celta e o Vilarreal, xunto á última hora do Leganés-Deportivo previsto para a noite do luns día 1 de setembro. Os goles do resto de partidos na Primeira e Segunda divisións profesionais, xunto aos resumos da Primeira RFEF completarán os 90 minutos de xogo, desde as 22:30 h.
Deportes nos Telexornais
A primeira canle da Televisión de Galicia abre amplas ventás ao mundo do deporte nos espazos informativos ‘Bos Días’, ‘Telexornal Mediodía’ e ‘Telexornal Serán’, con toda a actualidade dos equipos e deportistas galegos. Estás emisións chegan tamén nun segundo pase a través da segunda canle e están dispoñibles na plataforma AGalega.gal.