AGalega.gal emite este xoves, ás sete e media da tarde, os Premios Deporte Galego 2025 desde Lugo

Santiago, 27.10.2026.-  A gala dos Premios Deporte Galego do ano 2025 celebrarase este xoves, no auditorio Fuxan os Ventos de Lugo, coa emisión en directo a través de AGalega.gal a partir das sete e media da tarde. A entrega recoñecerá os éxitos, as traxectorias e os proxectos máis destacados do deporte galego da pasada temporada.

Entre os galardoados destaca Terio Carrera, xornalista da CSAG, que recibe o premio ao mellor labor informativo. O xurado recoñece así o seu papel como un dos principais referentes da información deportiva en Galicia, achegando diariamente á audiencia da TVG a actualidade e os protagonistas do noso deporte.

No apartado individual, a atleta Ana Peleteiro recibe o premio tras ser campioa de Europa en pista cuberta de triplo salto. Mentres, o padexeiro Jaime Duro obtén o masculino ao ser campión do mundo e de Europa de maratón distancia curta en C1. Entre os deportistas con discapacidade, os premios son para Susana Rodríguez Gacio (tríatlon), tras proclamarse campioa do mundo e de Europa, e Nicolás Martínez (piragüismo), campión do mundo de paracanoe maratón KL3 10.000 m. Na categoría revelación, a xogadora de baloncesto Inés Sotelo é premiada tras lograr a medalla de ouro no Europeo sub-20 e a de bronce no Mundial sub-19 coa selección española. Pola súa banda, o piloto de Silleda Cristian Costoya recibe o masculino por ser o campión de Europa de karting.

Entre os equipos, o Club Balonmán Porriño, subcampión da EHF European Cup, é o mellor feminino; o Celta de Vigo, clasificado para a Europa League cun cadro maioritariamente galego, o mellor masculino; e o Genuine RC Villalbés, de fútbol inclusivo, o mellor de deportistas con discapacidade.

A A. D. Baixo Miño é a mellor entidade na promoción do deporte de base; Claudio Giráldez (fútbol), o mellor adestrador, e Zeltia García (ximnasia), unha das 25 xuízas internacionais de categoría I da FIG, a mellor árbitra/xuíza. O Gran Camiño (ciclismo) é o mellor evento deportivo e Pescamar leva o premio ao patrocinio deportivo. Por ultimo, o Premio xogo limpo é ex aequo para Martín Jácome (piragüismo) e para a Federación Galega de Balonmán.