'Xente Marabillosa' estrea a súa temporada máis valente este domingo na TVG

Santiago, 30.11.2025.-    A Televisión de Galicia estrea este domingo a nova temporada de ‘Xente Marabillosa’ (22:00 h), un dos seus programas máis emblemáticos, influentes e socialmente transformadores. O espazo presentado por Lucía Rodríguez volve co obxectivo de emocionar, inspirar e poñer en valor a capacidade das persoas anónimas para contribuír a crear unha sociedade máis amable e inclusiva.

A nova temporada preséntase como a máis sensible, comprometida e valente ata a data, e chega coa determinación de seguirlles dando visibilidade a temáticas de actualidade coas que promover a conciencia e a convivencia. Deste xeito, a canle pública galega non só recupera un dos seus produtos estrela, senón que reafirma tamén o seu compromiso cunha televisión que escoita, que acompaña e que recoñece o mellor da sociedade.

A primeira entrega desta nova temporada, que terá como convidado o comunicador Pedro Piqueras, estará centrada na concienciación sobre o maltrato ás persoas maiores de 65 anos, que, por incrible que pareza en pleno século XXI, é un dos maiores problemas da nosa sociedade.

Pero ‘Xente Marabillosa’ tamén ten preparadas outras temáticas de forte carga emocional e social para as vindeiras semanas, como o fenómeno dos falsos curandeiros, coa participación de Xosé Ramón Gayoso; a integración real das persoas con discapacidade, que terá de convidada a Irene Villa, e a ‘xitanofobia’, coas Ázucar Moreno como personalidades destacadas. Tamén se tratarán as estafas do amor, a defensa do rico patrimonio de Galicia, a ‘turismofobia’, a realidade dos trastornos alimentarios, o día a día das persoas con Síndrome de Down e o aumento de situacións de discriminación polo aspecto físico, entre outros asuntos.

O programa mantén as súas xa famosas cámaras ocultas, que recrean situacións que permiten observar como reaccionan os galegos ante comportamentos neglixentes ou actitudes discriminatorias.

Éxito de audiencia e no ámbito dixital

Desde as súas primeiras emisións, o programa ‘Xente Marabillosa’ instaurou unha dinámica ascendente que o converteu en líder da súa faixa horaria en varias ocasións, con emisións que superaron os 190.000 espectadores en Galicia e con valores por enriba do 10 % de cota de pantalla. Estes resultados situárono como un dos programas autonómicos máis vistos do seu horario. 

O seu impacto non se limita á emisión lineal, senón que o fenómeno é aínda maior en plataformas dixitais, onde distintos fragmentos do programa superan o millón de reproducións individuais en temporadas pasadas, e onde o conxunto do formato acumulou máis de dez millóns de visualizacións en redes sociais, consolidando a súa dimensión transmedia e ampliando o seu impacto na sociedade. Este fenómeno converteu ‘Xente Marabillosa’ nun dos espazos da TVG con maior repercusión dixital nos últimos anos.

O recoñecemento tampouco se fixo agardar. En 2023, recibiu o Premio Iris ao Mellor Programa Autonómico, outorgado pola Academia da Televisión, que subliña tanto a súa calidade audiovisual como a súa contribución á sensibilización social.