'Galicia en Goles' ofrece este mércores unha edición especial coas retransmisións do Omonia-Celta e do Deportivo-Sevilla

Santiago, 16.09.2026.-    A Radio Galega e AGalegaAudio.gal ofrecen este mércores unha edición especial de ‘Galicia en Goles’, de 18:30 a 22:00 h, coa cobertura dos dous compromisos da xornada para o fútbol galego: a estrea do Celta na fase de liga da Europa League fronte ao Omonia de Nicosia, e o Deportivo-Sevilla, correspondente á sexta xornada da Primeira División.

Omonia-Celta: estrea europea sen Iago Aspas

O Celta de Vigo afronta este mércores o seu debut na fase de liga da UEFA Europa League 2026-27 cunha visita ao Omonia de Nicosia, campión de Chipre, no GSP Stadium de Strovolos. O encontro principiará ás 18:45 h, hora peninsular española.

O conxunto adestrado por Claudio Giráldez chega á cita nun momento complicado na competición doméstica tras o empate fronte ao Málaga, polo que segue sen gañar tras seis xornadas. A viaxe a Chipre xorde como unha vía para reconducir sensacións antes dun calendario esixente que, nas vindeiras xornadas da fase de liga, levará o equipo vigués a medirse tamén con Juventus, Celtic, Union Saint-Gilloise, Bournemouth, Olympique de Marsella, Lillestrøm e Hapoel Beer-Sheva.

Na convocatoria de 25 xogadores dada a coñecer por Giráldez destacan tres novidades, entre elas a de Hugo Burcio, que podería estrearse en competición europea. A ausencia máis sensible é a de Iago Aspas, que sofre unha rotura fibrilar de grao I no recto anterior da coxa esquerda. 

Deportivo-Sevilla: o fenómeno Aubameyang pon a proba a un rival en apuros

Riazor acolle ás 19:00 h o Deportivo-Sevilla, partido da sexta xornada da Primeira División, que se presenta como un dos máis atractivos do calendario polo gran momento do conxunto coruñés no seu regreso á máxima categoría tras oito anos de ausencia. O equipo adestrado por Antonio Hidalgo ocupa o 7º posto da táboa con 9 puntos (2 vitorias, 3 empates, 0 derrotas), mentres que o Sevilla, dirixido por Luis García Plaza, é 6º, con 10 puntos (3 vitorias, 1 empate, 1 derrota).

O gran reclamo do partido é o momento de forma de Pierre-Emerick Aubameyang. O dianteiro gabonés, incorporado este verán procedente do Olympique de Marsella, leva 5 goles en 5 partidos disputados esta temporada co Deportivo, converténdose no gran referente ofensivo do equipo e nun dos fenómenos individuais do arrinque ligueiro. Con 37 anos, Aubameyang é o máximo goleador histórico da Europa League e acumula máis de 240 goles nas cinco grandes ligas europeas. 

Todas as opinións, na última hora do ‘Galicia en Goles’

Cando deixe de rodar o balón sobre o céspede, Roberto Carlos Carballo abrirá o micrófono do ‘Galicia en Goles’ aos protagonistas do Omonia-Celta e do Deportivo-Sevilla, coa emisión das roldas de prensa dos adestradores e das entrevistas na zona mixta aos futbolistas máis destacados.