'Eu sei + ca ti' entrega o bote de 6.000 euros

Santiago, 29.8.2025.-  O concurso da Televisión de Galicia 'Eu sei + ca ti', presentado polo carismático Fran Nogueira, viviu este xoves, 28 de agosto, unha das súas noites máis emocionantes desde a súa estrea. No programa número 35, o equipo Os Escalenos conseguiu abrir a caixa forte e levar para casa o bote de 6.000 euros, despois de varias semanas de risas, tensión e momentos inesquecibles.

Formado por Suso (52 anos), profesor de matemáticas, Antonio (52 anos) e Marcos (40 anos), profesores de informática, Os Escalenos son un grupo de amigos e compañeiros de traballo do IES Maximino Romero de Lema, en Baio (Zas). A súa complicidade, espírito competitivo e unha boa dose de coñecemento foron as claves que os levaron a alcanzar este fito histórico no programa.

O trío tiña xa un percorrido brillante no concurso: acumulaba 2.475 euros en premios diarios e chegara ata en 12 ocasións á gran final sen lograr dar coa clave gañadora. Pero a súa insistencia tivo recompensa. Finalmente lograron descifrar o código secreto da caixa forte seguindo unha peculiar estratexia, que xa empregaran con anterioridade: colocar en orde ascendente os números que lles faltaban ata completar a combinación de dez díxitos.

Na súa carreira cara ao bote, Os Escalenos tiveron que enfrontarse a dous equipos moi combativos: Os Cucos –formado por Gara, Martín e Meri– e As do Castro, con Pili, Belén e Candela, procedentes de Vigo. No transcurso do programa o trío de profesores logrou impoñerse e avanzar á rolda decisiva, onde a sorte, pero sobre todo un pleno de tres acertos, lles facilitou a posibilidade de abrir a caixa forte e celebrar unha vitoria moi traballada.

O éxito dos Escalenos é tamén un reflexo do espírito do 'Eu sei + ca ti', un formato en que tres equipos con tres integrantes compiten cada noite por demostrar que saben máis cós demais. Cunha mecánica áxil e entretida, que mestura preguntas de cultura xeral, probas musicais e desafíos á lóxica, o concurso busca sorprender e divertir á audiencia galega. 

Desde a súa estrea en xullo, 'Eu sei + ca ti' converteuse nun dos programas máis seguidos do 'prime time', ofrecendo unha perfecta combinación de risas, curiosidades e moita competitividade. O público galego poderá seguir gozando de novas entregas do 'Eu sei + ca ti' de domingo a xoves na Televisión de Galicia, con máis equipos dispostos a demostrar que saben máis cós seus rivais... e quizais, algún día, a levar tamén o ansiado bote.